Äfğänstannıñ könbatışındağı Herat şähärendä Äfğän politsiäse protest demonstratsiäsenä ut açıp kimendä 3 keşene yaraladı.
9-nçı fevral'dä Heratta sönnilär belän şığıylar arasındağı bäreleşlärdä 5 keşe hälak bulğan ide.
Bügen berniçä yöz keşe Herat başlığı Säyet Xösäin Änwäri idaräse yanına cıyılıp anı häm cirle xakimiätlärne bäreşlärgä yul quyuda ğäyepläde. Törkem Änwärine wazıyfasınnan alunı taläp itte.
Politsiä başta törkemne taratu öçen hawağa atqan, ämma qayberäwlär idarä binasına bärep kerergä tırışqan. Şunnan soñ politsiä alarğa atıp 3 keşene yaralağan.
Heratnıñ başqa urınnarında protest belderüçelär İran konsullığına häm qayber yardäm oyışmalarına taşlar attı.
