Accessibility links

якшәмбе, 4 декабрь 2016, Казан вакыты 15:30

Xärbi bülektä qıynalğan soldatnıñ xäle awır qala


Uzğan tapşıruıbızda bez Ufa yanındağı ber xärbi xezmät bülegendäge başqa ğädättän tış xäl xaqında qısqaça ğına mäğlümat birgän idek. Ufadağı 8 nçe sanlı klinik xastaxanägä 8 fevral' könne bik awır xäldä ber soldat kiterelä. Dağstannan yartı yıl elek Rusiä armiäse saflarına alınğan Nösrulla Daudov Ufa yanındağı Yaña Aleksanrovqa awılı qırındağı xärbi tözeleş batal'onında xezmät itkän bula. Qayber çığanaqlardan alınğan xäbärlärgä kürä, 7 fevral' könne anı üze xezmät itkän bülektäge ofitserlar qıynağan. Nösrulla Daudov bik küp tän cäräxätläre alğan. Ayıruça başı nıq zägıyf'längän kileş ber täwlek ütkäç kenä, yäğni 8 fevral' könne yaqındağı 8 sanlı xastaxanägä añsız xäldä kiterelä ul. Biredä qaza kürgän soldatqa aşığıç räweştä bik qatlawlı operatsiä yasıylar häm reanimatsiägä urnaştıralar.

Comğa irtäsendä, soldatnıñ xälen beleşü öçen, “Azatlıq” xäbärçese xastaxanäneñ baş tabibı Ramil Mägafurovqa möräcäğät itte. Ramil äfände xäbärçegä barı tik soldatnıñ älegä stabil' awır xäldä buluı xaqında ğına belderde. Artıq mäğlümat birüdän baş tarttı. Xärbi prokuratura xezmätkärläre kilü-kilmäwe xaqındağı sorawğa da ul qısqa ğına cawapladı. “Alar bezgä kilmäde. Xärbi prokurorlar Daudov xezmät itkän xärbi bülektä tikşerü ütkärgänlege genä mäğlüm miña”, - dide Ramil Mägafurov.

Töş waqıtında awır operatsiä kiçergän soldatnıñ 8 nçe sanlı xastaxanädän respublika klinik sırxawxanäsenä küçerelüe turında xäbärlär işetelgäç, bez monıñ döreslegen tikşerü öçen, tağın Ramil äfändegä telefonnan şaltırattıq.

Şulay itep Ufa yanındağı xärbi bülektä ofitserlar tarafınnan qatı qıynalğan soldat Nösrulla Daudov Başqortstannıñ respublika xastaxanäsenä küçerelgän. Ufağa anıñ ir tuğanınıñ kilüe dä mäğlüm buldı. Ämma älegä anı kürü mömkin bulmadı bezgä. Xärbi prokuraturağa şaltıratuıbız da zur näticä birmäde. Andağı elemtädä bulğan dejur xezmätkär prokuratura xezmätkärläreneñ bu xälne äle urında tikşerüen äytep, bernindi dä östämä añlatmalar birelmäyäçägen iskärtte. Daudov xezmät itkän xärbi bülek Başqortstan xärbi komissariatı qaramağında bulmawı da açıqlandı. Ul Samara şähärendäge 2 nçe armiä qaramağındağı xärbi bülek ikän. Niçek kenä bulmasın, älege ğädättän tış xäl Başqortstan cirendä bulğan häm anıñ säbäplären biredä tikşerergä turı kiläçäk. Aldağı könnärdä bez Nösrulla Daudov tiräsendäge xällärne küzätep torırbız.

Fänis Fätxi, Ufa

XS
SM
MD
LG