Accessibility links

якшәмбе, 11 декабрь 2016, Казан вакыты 13:11

Ariel Şaronğa açığış operatsiä yasaldı, anıñ xäle beraz totrıqlansa da, awır qala birä


İzrailneñ 4-nçe ğinwardan birle märttä yatqan premyer-ministrı Ariel Şaronnğa şimbä könne aşığıç operatsiä yasaldı. Tönlä anıñ xäle kinät kenä naçaraya başlağan ide. Yirusalimdäge tabiblar, Şaronğa inde ülem yanıy dip kisätä.

Ğinwar başınnan birle 77 yäşelek Ariel Şaronnıñ xäle berniçek tä üzgärmi kilgän ide, mienä qan sawğannan soñ ul hiç añına kilä almadı. Şimbä irtän isä ul däwalanğan Xadassah xastaxanäse wäkile kötelmägän belderü yasadı:

"Bügen irtängä premyer-ministr Ariel Şaronnıñ xäle kinät naçaraydı, nurlar belän anıñ aşqazanı tiräläre tikşerelgännän soñ, azıqnı eşkärtü sistemasına zur zian kilüe açıqlandı häm anı yañadan operatsiä bülmäsenä alu turında qarar itelde", di Yirusalimdäge Xadassah xastaxanäse wäkile Ron Krumer.

Operatsiä şunda uq yasala başlağan, häm xastaxanäneñ ikençe ber wäkile Yael Bossem Levy süzlärenä qarağanda, anda "Şaronnıñ xäle bik awır buluı, anıñ tormışına qurqınıç yanawı açıqlanğan".

Qan sawu kiçergennän birle bu inde Şaronğa yasalğan cidençe operatsiä. Anıñ mie daimi tikşerelep tora, häm anda ällä ni zur üzgäreşlär küzätelmi. Ämma belgeçlär, ul kiçergän berençe qan sawu häm soñraq aña yasalğan operatsiälär Şaronnıñ inde añına kilmäwenä işarä itä, dip belderä.

İzrail inde äkrenläp Ariel Şaronnıñ säyäsi tormıştan kitüe belän kileşep kilä şikelle. Martta uzaçaq ğomumi saylawlarda yañadan ciñep çığu öçen Şaron yaña ber partiä - Qadimä partiäsen qorğan ide, xäzer anı premyer wazifaların ütäwçe Ehud Olmert citäkli häm fiker beleşülär kürsätkänçä, Qadimäneñ martta ciñü ixtimalı haman da yuğarı bulıp qala birä.

Soñğı xäbärlär Ariel Şaronnıñ säyäsättän genä tügel, tormıştan kitü ixtimalın da arttıra, ämma İzrail xalqı monı xäzer qurıqmıy qabul itä sıman. Yirusalimdä yäşäwçe ber xatın şimbä irtän

"Min premyer-ministrıbız Ariel Şaron bu dönyadan zur xörmät belän kitär, dip ömetlänäm, märttä yatunıñ kiläçäge yuq. Ul bik äybät keşe ide, üz-üzen üzgärtä aldı häm anıñ fälästin-İzrail araları ölkäsendäge ğämälläre bezgä kürşelärebez belän tınıçlıqta yäşärgä mömkinlek açır, dip ömetlänäm" digän ide.

Kärim Kamal
XS
SM
MD
LG