Accessibility links

Кайнар хәбәр

Omski yağında fermerlarnıñ eşläre niçek bara?


Rusiäneñ küp kenä töbäklärendä kebek, Omski yağında da kolxoz-sovxozlar tarqalğannan soñ, fermer xucalıqları oyışıp, eşläp kitkän idelär. Ämma qızğanıç, xucalıqlarınıñ qayberläre yaña şartlarğa yaraqlaşa almıyça, fermerlıq eşen tuqtatırğa mäcbür buldılar. Bol'şereç'ye rayonınıñ Tusqazan awılında , mäsälän, 1992-93 yıllarda 8 fermerlıq xucalığı oyışqan ide. 3-4 yıl ütkännän soñ, alarnıñ 5-se, törle säbäplär arqasında, eşçänlegen tuqtattı. Qalğan öçeseneñ eşläre xäzerge köndä niçek tora? Yullarında awırlıqlar oçrıymı, nindi problemaları bar? Ğomumän, ni räweştä eş alıp baralar?

Tusqazan awılında fermerlıq eşen bügen dä däwam itüçe - Şämsetdin İbrahimovnıñ eşläre uñışlı ğına bara dip äytergä mömkin. Aşlıq cıyıp alınğan, xaywannarğa peçän äzerlängän, gömümän, barlıq eşläre dä ber cayğa salınğan. Ämma läkin, bu berençe qaraşqa ğına. Şämsetdin äfändeneñ problemaları da yuq tügel. Alarnıñ iñ qatlawlısı – yağulıq bäyäseneñ yuğarı buluı häm daimi üsep toruı. Citeştergän häm satıp cibärgän aşlığı öçen aqça almağan oçraqlar da bula ikän Şämsetdin äfändeneñ. Ämma aşlığı öçen aqça almağan waqıtta da, ul eşen tuqtatırğa cıyınmıy, niçek tä bulsa ber cayın tabarbız, - di. Şul uq waqıtta, awılnıñ ikençe ber fermerı – Linnur Axunovnıñ, yazğı çäçüne uñışlı başqarıp çığa aluına, ömete yuq däräcädä. Anıñ monnan ber-niçä yıl elek çäçkän igene qar astında qalğan. Bilgele ki, aşlıq cıyılmağan häm satılmağan Näticädä kredit häm başqa burıçlar tülänmiçä qalğan. “Bıyıl igen igü öçen aqça taba aluıma ömet yuq däräcädä”, - di Linnur äfände.

Tusqazan fermerları - Şämsetdin İbrahimov ta, Linnur Axunov ta, başqalar da fermerlıq eşe uñışlı barsın öçen, xökümättän yärdäm bulırğa tieş dip sanıylar.Alarnı awılda mallarnıñ sanı kimüe, tormışınıñ qatlawlanuı, gömümän, awılnıñ kiläçäge nindi bulır digän uy borçıy.

Östäp şunı da äytergä kiräk, uzğan közne ütkän cirle saylawlarda Şämsetdin äfände awıl xakimiäte deputatı bulıp saylanğan ide. Burıçlarınıñ küp märtäbälär artuına qaramastan, Linnur äfändedän ayırma bularaq, ul eşläreneñ uñışlı baruına ömeten yuğaltmağan. “Bez eşlämäsäk, bu eşlärne kem başqarır? Bez bu cirdä yäşibez, dimäk anı eşkärtergä dä tieşbez. Cir märxämätle ul, eşläsäñ, uñışsız qaldırmıy. Tırışıp eşlärgä genä kiräk”, - di.

Saniä Mirxaleeva, Omski

XS
SM
MD
LG