Accessibility links

якшәмбе, 4 декабрь 2016, Казан вакыты 06:54

“Yaña ğasır” televideniesen – här yortqa


Ural töbägendä “Tatarstan – Yaña ğasır” sputnik televideniese tapşıruların här yortqa citkerü buyınça eş däwam itä. Bügenge köndä Sverdlovski ölkäseneñ un şähärendä kabel' çeltäre aşa, 44 awıl häm bistädä xalıq cıyılıp qarıy torğan urınnarda bu tapşırularnı qaraw mömkinçelege bar.

Ämma şul uq waqıtta çişäse problemalar küp äle. Kabel' çeltäre citäkçeläre öçen bu eş kerem yağınnan bik faydalı bulıp kürenmi. Şunlıqtan, quätle sänäğät, fän, mädäniät üzäge bulıp sanalğan Yekaterinburg şähäreneñ qayber rayonnarında TNV tapşıruları kürsätmi. Şulay uq Sverdlovski ölkäseneñ kabel' çeltäre kiñ üseş alğan tağın yegerme şähärendä Yaña ğasır televideniese tapşıruların här yortqa citkerü mömkinçelege qullanılmıy.

Şuşı problemalarnı çişü niäte belän, Tatarstannıñ Uraldağı daimi wäkillegendä küptän tügel yuğarı däräcädäge zur kiñäşmä uzdırıldı. Kiñäşmädä Yaña ğasır telekompaniäseneñ general' direktorı urınbasarı Vladimir Matveev, Sverdlovski ölkä gubernatorı häm Yekaterinburg şähär xakimiäte wäkilläre, ölkä Zakonnar cıyılışı deputatları, Yekaterinburg şähär dumasına saylanğan biş tatar deputatı, sänäğät ministrlığı xezmätkärläre häm “Yevrotel”, “İnfotek”, “Yevraziä” kebek iñ ere kabel' çeltärläre citäkçeläre qatnaştı.

Tatarstannıñ Uraldağı daimi wäkile urınbasarı Xäydär Ğıyl'fanov kiñäşmäneñ konstruktiv häm näticäle bulıp uzuın assızıqladı Deputatlar xakimiät wäkilläre belän qatği söyläşü alıp bardılar. Ber ay eçendä xakimiät wäkilläre Sverdlovski ölkäsendäge kabel' çeltäre üseşe, ul bulğan cirlärdä Yaña ğasır televideniese signalın ni säbäptän alu-almaw turında analitik mäğlümat äzerläp, kiläse oçraşuğa alıp kilergä tieş. Annan soñ xökümät isemennän urındağı xakimiät başlıqlarına häm kabel' televideniese citäkçelärenä xatlar cibäreläçäk.

Kiñäşmädä şulay uq Yaña ğasır teleradiokompaniäseneñ Uraldağı korpunktın buldıru mä’säläse dä kütärelde. Qatnaşuçılar fikerençä, bu mä’säläne uñay çişü TNV tapşıruların eçtälek yağınnan tağın da yuğarıraq däräcägä kütärer häm Uraldağı millionlağan tamaşaçınıñ bu tapşırular belän qızıqsınuın köçäyter ide. Kiñäşmädä TNV kanalınıñ general' direktorı urınbasarı Vladimir Matveevqa korpunkt mä’säläsen bergäläp çişü turında täqdim belän möräcäğät itelde.

Ğomumän alğanda, kiñäşmä bik citdi häm eşlekle räweştä uzdı. Tatarstannıñ Uraldağı daimi wäkillege citäkçeläre bu kiñäşmäne tarixi waqiğa dip atadılar. Alar äytüençä, xalıq saylağan deputatlar çınlap ta xalıq mänfäğätlären bik citdi yaqlap çıqtılar, üzläreneñ citdi, zur köç ikänleklären kürsättelär. Daimi wäkillek citäkçeläre monnan soñ da xalıq saylağan tatar deputatları belän tığız elemtädä eşläyäçäklären belderdelär.

Fäwiä Safiullina,Yekaterinburg

XS
SM
MD
LG