Accessibility links

җомга, 2 декабрь 2016, Казан вакыты 21:17

Sverdlovski ölkäsendä etnik problemnarğa bağışlanğan yaña säxifä açıldı


Sverdlovski ölkäse millätara kitapxanäse binasında Millätara mäğlümat üzäge başlanğıçı belän “Töbäklärdäge internet mäğlümat çaralarında milli tematika” dip atalğan tügäräk östäl oyıştırıldı. Biredä törle milli oyışmalar wäkilläre, ğämmäwi mäğlümat çaraları citäkçeläre, jurnalistlar, Sverdlovski ölkäse gubernatorı häm Yekaterinburg şähär xakimiäte wäkilläre, ölkä xökümäteneñ keşe xoquqların yaqlaw apparatı xezmätkärläre, Amerika häm Velikobritaniä illäreneñ Uraldağı ilçelekläre wäkilläre qatnaştı.

Tügäräk östäl yanına cıyıluçılar Millätara mäğlümat üzäge tarafınnan internet mäğlumat agentlıqlarında milli problemalarnı yaqtırtu buyınça uzğan yılnıñ közendä uzdırılğan monitoring näticäläre belän tanıştılar. Şunısı ayanıç, monitoring uzdırılğan biş ay waqıt eçendä etnik temalarğa yaqtırtılğan 225 xäbärneñ 52 protsentı negativ, yäğni tiskäre mäğlümatnı täşkil itä. Uñay yaqlar yaqtırtılğan xäbärlär nibarı 27 protsent, bitarafraq materiallar 21 protsent.

Sverdlovski ölkäse keşe xoquqların yaqlaw apparatı citäkçese Tat'yana Merzlyakova bu xälne jurnalistlarnıñ professional ostalıqları citmäwdän kilä dip belderde.

“Qızdırğan” faktlar artınnan quuçı jurnalistlar etnik temalarnı tiränten öyränmilär, küp kenä närsälärdän xäbärdar tügellär, materialnı aşığıp, östän genä yaqtırtalar, dide Tat'yana xanım.

Ul Daniä matbuğatında bastırılğan karikatura misalında, “süz irege” digän närsä hiçniçek tä ber xalıqnı da ränceterlek bulırğa tieş tügel dip, milli tema kebek neçkä, saq mönäsäbät taläp itä torğan temanıñ bügenge köndä säyäsi totrıqlılıqta bik zur ähämiätle rol' uynawın assızıqladı.

Tügäräk östäl yanına cıyıluçılar aldında, Millätara mäğlümat üzäge tarafınnan küpmillätle Ural xalıqlarınıñ milli tormışın, etnik problemalarnı, migratsiä mä’sälälären, keşe xoquqların yaqtırta torğan yaña säxifä açılu uñayı belän, älege säxifäne täqdir itü bulıp uzdı. Här milli oyışmanıñ bu säxifägä mäğlümat birä aluı, borçığan mä’sälälärne kiñ cämäğätçelekkä çığara alu mömkinlege añlatıldı.

Fäwiä Safiullina

Yekaterinburg

XS
SM
MD
LG