Wafirä Ğizzätullinanıñ 60 yıllığı mart ayında bilgeläp üteläçäk

Milli añ ul - şundıy izge ber xis,

Äytep betermäslek süz belän!

Tönnär-könnär ütä şul xis belän,

Meñ märtäbä üläm – tereläm.

Millät diep şulay tilmeräm,

Kiräk ikän şulay utqa keräm,

Suğa batam,

Kiräk ikän tatar diep üläm!

Yuq, ülmim äle, tereläm,

Tatar yäşär diep ömetlänäm,

Sezneñ belän bergä söyenäm!

Zöhrä Aysina, Tatar xalqı Milli Mäclese citäkçeläreneñ berse, Wafirä Ğihzzätullinanıñ facigle ülemenä ber küpme qala yazğan şiğerlären uqıy. Cämäğätçelek, Wafirä Ğizzätullinanı tanılğan cırçı, Tatarstannıñ, Qaraqalpaqstannıñ xalıq, Rusiäne atqazanğan artistkası bularaq belsä, soñğı yıllarında ul aşqınıp –aşqınıp muzıka yazdı, häm şiğerlär icat itte. Menä şuşı soñğı şiğerläreneñ bersen, Zöhrä Aysina uqıdı.

Wafirä Ğizzätullinanıñ 13 fevral'dä tuğan köne. Üze isän bulsa, ul 60 yäşlek yubileyen uzdırğan bulır ide. Läkin, talantlı cırçınıñ 2001 nçe yılnıñ sentäber ayında, maşina qazasına oçrap canı özelde. Ul 56 nçı yäşe belän bara ide.

Tatarstannıñ Mendeleevsk rayonında, Qamay awılında tuıp üskän Wafirä Ğizzätullina tuğan yağında mäñgelekkä ozatıldı.

Tatar cämäğätçelege Wafirä Ğizzätullinanı cırçı bularaq qına tügel, ä 1990 yıllarda Respublikada görlägän azatlıq köräşe belän dä xäterli. Ul çaqlarda, Qazannıñ İrek mäydanın küplär xäterlider äle.

Köräş bara, köräş, il, watan azatlığı öçen, milli yañarış bulsın da, tatarlıq yäşäsen, üssen öçen. Wafirä mäydan türendä. Başqa milli äydämannar kebek ük.

Mäydannan Wafirä Ğizzätullinanıñ “Qom buranı” cırı yañğırıy

Şundıy bäxetle köräş mizgelläre belän, Wafirä Ğizzätullinanıñ yaña tormış säxifäse açıla. Ul säyäsät dönyasına çuma. Läkin, här yıl sayın diärlek, Qazannıñ märtäbäle Qamal teatrı säxnäsendä üzeneñ benefisın uzdırıp kilde. İcattan ber qaşıq ta ayırılmadı.

Cırçınıñ soñğı könnäre turında Anıñ köräştäş dustı, Zöhrä Aysina söyli

Bez Wafirä apa belän bik dus idek, berençe könnärdän ük milli xäräkättä yördek, köräştek. Ul bik millät öçen köräşte häm millät öçen köräşep ülep kitte dip äytä alam. Ülär aldınnan öç kön qalğaçtın, min anıñ öyenä bardım. Ul bik awırtadır ide, käyefe yuq ide. Wafirä apa mine üz awılına çaqırdı, bez anıñ belän bergä qaytıp kitärgä tieş idek. Läkin min, üzemneñ tuğan awılğa kittem, äni yanına. Alarda söyläşkändä, min, Wafirä apa, nigä bolay küñelegez töşenke dip soradım. Ul, miña, señelem, niçekter mine töşemdä äni üze yanına çaqıra, urın äzerläp quydım dip söyläde. Ä änise bit ülgängä berniçä yıl uzğan ide. Tatarlarda äytem bar, keşe ülemen aldan sizä digän şul buldı axırı.

Bez anıñ belän ozaq qına söyläşep utırdıq. Kitkändä, ni öçender ikebez dä küzlärebezgä qarıy almadıq. Minem bu mizgellär xäzer dä xäteremdä

Wafirä Ğizätullinanıñ köräştäş dustı Zöhrä Aysina buldı.

Bügenge köndä, Tatarstannıñ Mendeleevsk şähärendäge sänğät mäktäbenä Wafirä Ğizzätullina iseme birelde. Monnan tış rayonda, cırçı isemendä yäş cırçılar bäygese dä uzdırıla. Läkin, Qazanda, cırçınıñ qızı Kamilä Milli Mäclestän yaqlaw ezli ikän. Zöhrä Aysina söyli

Milli Mäcleskä Wafirä apanıñ qızı Kamilä kilep kerde, uzğan şimbä könne. Türälär buyınça yörep arığan. Bezgä yärdäm sorap kilde. Milli Mäcles cıyıldı häm qarar qabul itte. Mäcles üz xisabına ul yäşägän yortqa istälek taqtası quyaçaq. Monnan tış, istäleklär kitabı da çığaraçaq. Bu eşlär öçen çığımnı, Nurulla mäçete imamı Ğabdulla Ğaliulla aldı

Monnan tış, Milli Mäcles mart ayında, cırçını iskä alu kiçäse dä oyıştırırğa cıyına.

Xalıq küñelendä sanduğaç kebek cırçı, millät öçen tınğısız yöräkle köräşçe bulıp Wafirä Ğizzätullina xäterdä gel qalır.

Azatlıq radiosınıñ, äle Myunxenda urnaşqan çorında uq efirda yañğırağan cırlar tuplanması bar. Xäzer şuşı tuplanmadan, Wafirä Ğizzätullina başqaruında, Röstäm Yaxin tarafınnan Sibğat Xäkim süzlärenä yazılğan cırnı tapşırabız.

“Öyänkelär” cırı yañğırıy

Räfis Cämdixan