Accessibility links

Rusiä citäkçeläre ğäskärdäge cäbergä qarşı köräş turında söyli, cäber isä däwam itä


Başqortstan prokuraturası Ufada ber Dağstanlı ğäskärine qıynap üterü oçrağın tikşerü öçen cinayät eşe açqan. Andağı faciğä Rusiä citäkçeläreneñ ğäskärdäge cäbergä qarşı qırıs köräş kiräklege turında belderep toruı sürätendä buldı.

"Azatlıq" radiosı inde xäbär itkän ide - Rusiä ğäskärenä Dağstannan alınğan 23 yäşlek Nursulla Dautov Ufa xastaxanäsenä xezmättäşläre tarafınnan qatı qıynalıp, ike kön ütkännän soñ ğına kiterelgän bulğan. Düşämbedä anıñ şul qıynaw cäräxätlärennän ülüe xäbär itelde. Radiobıznıñ bu xaqta kübräk mäğlümat alu niäte belän Ufa klinik xastaxanäsenä şaltıratuına mondıy cawap alındı:

Ufada, häm ber anda ğına tügel, qayberäwlär, bu faciğäneñ şulay ülem belän bik tiz genä "yabıluın" teläsä dä, alar Rusiäneñ töp citäkçese prezident Vladimir Putin äytkännärgä bötenläy qolaq salmıy kebek - äle ike atna elek kenä ul ğäskärdäge cäberläwlär turında bolay dip beldergän ide:

"Bezgä xärbi xezmättägelärneñ şäxsi xoquqların, sotsial'' yaqlawın garantiäläwgä iğtibarnı arttırığa, häm ğäskärdä teläsä nindi köç qullanu oçraqlarına, türälärneñ alarnı yäşerergä tırışuına qarşı şunda uq qırıs cawap qaytarırğa kiräk", digän ide Vladimir Putin.

Rusiä prezidentı şuşı belderüen ikençe ber yäş ğäskäri Andrey Sıçov faciğäse uñayınnan yasadı. 18 yäşlek Sıçov üzeneñ altı xezmättäşe tarafınnan şul xätle qatı qıynalğan ide ki, soñraq tabiblar anıñ ayaqların häm censi äğzaların kisärgä mäcbür buldı. Şuşı wäxşät Rusiä cämäğätçelegenä mäğlüm bulğannan soñ saqlanu ministrı Sergey İvanov maxsus tikşerü komissiäsen oyıştırıp, ul açıqlayaçaq bar mäğlümatnı da xalıqqa citkeräçägen wäğdä itte.

İlneñ yuğarı citäkçelege ğäskärdäge "dedovçina", yäğni yäşräk rekrutlarnı cäberläwgä qarşı köräş alıp baraçağı xaqında şundıy qırıs belderülär yasasa da, Nursulla Dautov häm ber ğinwar ayında ğına törle cinayät wä qazalar näticäsendä hälak bulğan tağın 53 ğäskärigä alar inde yardäm itmäde. Şularnıñ 14-e üzlärenä qul saluçılar bulğan.

Dağstanlı Dautov olıraq xezmättäşlärenä idän yuudan baş tartuı belän oşamağan, monıñ näticäse - mienä qan sawu, eçke äğzalarına zian kilü, yözendäge cäräxätlär, häm öç könnän soñ şul cäräxätlärdän ülüe. Bolar barısı da Ufadağı xastaxanä tabibları tarafınnan räsmän terkälgäne.

"Dedovçina" küreneşe Rusiä ğäskäre öçen yaña närsä tügel, ul sovet çorınnan qalğan miras. Läkin cäberläwlär däräcäse soñğı yıllarda tağın da arttı ğına. Monıñ säbäpläre arasında belgeçlär ğäskärdäge äxlaqnıñ tağın da nıq qaqşawı, äzerlekle ofitseralrnıñ citeşmäwe, Tönyaq Kavkazdağı xällär yata dip belderä. Östäwenä Rusiäneñ yuğarı xärbi citäkçelege andıy cäberläwlärneñ qorallı köçlärdä kiñ cäyelüen kire qağa.

Şuşı problema belän yaqınnan şöğellängän Soldat anaları komitetı, saqlanu ministrlığı küreneşneñ çın külämen yäşerä, här yılnı Rusiä qorallı köçlärendä "dedovçina"dan 3 meñläp yäş ğäskäri ülä, dip belderä. "Human Rights Watch" oyışmasınıñ Mäskäwdäge wäkile Saşa Petrov, ğäskärdäge şul yaman küreneşneñ bar cämğiatkä yasağan tiskäre yoğıntısı turında bolay di:

"Generallar belän söyläşkändä alar, ğäskär ul barı tik cämğiatneñ közgese genä, dip äytergä yarata, ämma bu inde döres tügel, ğäskär xäzer cämğiattä barğan üzgäreşlärdän artqa qala", di xoquq yaqlawçı Petrov.

Şul iğtibarnı cälep itä - Andrey Sıçov faciğäsen çağıtırmaça kiñ yaqtırtqan Rusiä mäğlümat çaralarında Dağstanlı Nursulla Dautov üleme xaqında ällä ni xäbär kürenmäde.

Kärim Kamal
XS
SM
MD
LG