Accessibility links

сишәмбе, 6 декабрь 2016, Казан вакыты 19:05

İzge Valentın köne Qazanda xakimiätlär başlanğıçı belän ütkärelde


14 fevral’dä, Tatarstan da , Qazan da izge Valentın köne zur bäyräm däräcäsendä ütkärelä. Kibetlärdä, şokolad, yöräk räweşendä yasalğan waq-töyaklär küpläp satıla. Meñlägän qızlarnıñ yöräkläre 14 fevral könne büläk kötep, ayıruça dulqınlanıp tipte. Küp mäktäplärdä tartmalar quyılıp, mäxäbbät xatları cıyıldı. Älege xatlarnı sıynıftan sıynıfqa yörep, adresatlarına tapşıru, kiçen diskoteka uzdıru, serläşü, fiker alışu – bu bäyrämneñ mizgelläre. Säwdä üzäklärendä, ğaşiqlar könenä bağışlap, maxsus bäyräm çaraların uzdıra. Tatar FM-radioları, yaña ğasır häm tatar radiosı da bu könne, ber bersennän uzdırıp, mäxäbbätkä dan cırladı, lirik şiğerlär tapşırdı, cırlar uynattı. Şähär xakimiätläre başlanğıçı belän, ayırım alğanda, Qazan yäşlär komitetı häm yäm şähär başlığınıñ yaña urınbasarı Zöhrä Niğmatullina citäkçelegendä, «Min yaratam» digän aksiä uzdırıldı. Zur säwdä üzäklärendä, video-kamerlar quyılıp, Qazanlılarğa teläsä kemgä teläsä närsägä mäxäbbäten añlatırğa mömkinlek birelde. Berniçä atna barğa bu çarada, 3 meñläp Qazan keşese qatnaşqan ikän. Kreml tawı itägendä «Bez, Qazannı yaratabız» dip yazılğan qızıl yöräk barlıqqa kilde. Berniçä metr kiñlegendäge qizıl tuqıma yöräk formasın qabatlap, qarğa batırıp quyılğan ide. Bu – xakimiätlrgä yaqın, «Bez» xäräkäte eşe ikän. «Min yaratam» digän aksiädä qatnaşuçılarğa Basketxol binasına çaqırulı ide. Qazannıñ SPİDqa qarşı köräş üzäge dä, bu bäyrämgä üz öleşen kertte, Qazannıñ üzäk uramında prezervativlar tarattı. Bu çara, «mäxäbbätne» saqlağız, digän şiğar belän ütkärelde. SPİD üzäge wäkilläre xäbär itkänçä, alar bu çaranı näq 14 fevral’gä turı kiterep ütkärälär. Çönki mondıy könne yäşlär üzlären bik irken tota häm awırulardan saqlanu turında uylamıy ikän.

Bikä Timerova

XS
SM
MD
LG