AQŞ däwlät departamentı Qazaxstan xakimiätlären Qazaxstan oppozitsiä citäkçese Altınbäk Sarsenbayevnıñ ülemen tikşerergä çaqırdı. AQŞ däwlät departamentı süzçese Amanda Rogers-Harper Waşingtonnan Azatlıq radiosına tikşerü kiçekmästän ütkärelergä tieş dide.
"Bez Qazaxstannı Sarsenbayevnıñ, häm anıñ belän bergä üterelgän 2 yardämçeseneñ ülemen kiçekmästän häm centekläp tikşerergä çaqırabız" dide Rogers-Harper.
Qazaxstannıñ oppozitsiädäge Çın aq yul partiäse citäkçeläreneñ berse Altınbäk Sarsenbayevnıñ, anıñ tän saqçısınıñ häm maşina yörtüçeseneñ mäyetläre kiçä Almata yanında tabıldı. Üterüneñ niçek bulğanlığı äle açıq tügel. Prezident Nursoltan Nazarbayev tikşerü ütkärergä kürsätmä birde. Çın aq yort wäkilläre bu üterü xakimiätlär eşe dip sanawın belderde. Sarsenbayev Çın aq yul partiäse räistäşläreneñ berse ide. Elegräk ul Qazaxstannıñ Rusiädäge ilçese bulıp eşläde, 2 märtäbä mäğlümät ministrlığın citäkläde.
