Accessibility links

җомга, 9 декабрь 2016, Казан вакыты 14:51

Kommunistlar arasında fetnä barıp çıqmadı


Rusiä kommunistlar firqaseneñ Başqortstan bülekçäsendä büleneş bulğan ide. Ber törkem kommunist Ğäli mäcles uzdırıp, yaña citäkçelek sayladı. Yaña saylanğan räis Vladimir Nesterov üzenä qädär citäkçelek itkän Rinat Ğäleyevnı milli, başlıça, tatar problemnarı belän şöğellänüdä, tatar oyışmaları berlege räise Rämil Bignov belän xezmättäşlektä ğäyepläde. Rinat Ğäliev isä Ğäli mäcles wäkälätsez dip, anı tanımadı. Älege mäsälägä Mäskäwdän — Üzäk komitettan kilgän wäkillär noqta quydı. Rusiä däwlät Duması deputatları Nikolay Sapojnikov häm Yevgeniy Ğäzeyevlar Ğäli mäcles wäkälätsez digän näticä yasağannar. Alar fikerençä, çaranı uzdıru idärädä qaralırğa, anı motlaq firqa räise alıp barırğa tieş. Şulay uq tawış birüdä üzläre qatnaşmawçılarnıñ ışanıç qäğäzläre faydalanırğa tieş tügel. Şuşı öç säbäptän Ğäli mäcles legitim tügel dip tabıldı. Üzäk komitet wäkilläre Mäskäwgä oçu öçen Ufa aeroportına barğaç, alarnıñ berse — Yevgeniy Ğäzeyev belän respublika Prezidentı xaqimiäte başlığı Radiy Xäbirov oçraşqan. Bu turıda internetnıñ “Başnyus” säxifäse xäbär itte. Aña qarağanda, Xäbirov Üzäk qomitet äğzasın inandıra almağan. Rinat Ğäliev bu fetnälär artında Prezident xaqimiäte tora dip isäpli. Anıñ uyınça, bu Rusiä däwlät Dumasına saylawlar aldınnan firqäne “kesägä salu” öçen eşlänä.

XS
SM
MD
LG