Accessibility links

Кайнар хәбәр

İran öçen urannı Rusiädä bayıtu täqdime turında söyläşülär 20 fevraldä başlana


Xäbärlärgä qarağanda, İran wäkilläre Tährannıñ atom programması turında söyläşülär öçen 20-nçe fevral'dä Mäskäwgä kiläçäk. Söyläşülär Rusiäneñ İran atom reaktorları öçen urannı Rusiädä bayıtu täqdime turında baraçaq. Bu İran atom qoralı yasarğa mömkin digän xalıqara borçılularnı tınıçlandırırğa mömkin çişeleş dip qarala. Strassburgta Yewropa Berlege deputatları aldında çığış yasap Berlekneñ Yustitsiä komissionerı Franco Frattini Tährannı Rusiäneñ täqdimen qabul itärgä çaqırdı. Ägär İran uran bayıtu eşçänlegen tuqtatıp Rusiäneñ täqdimen qabul itsä, mäs'äläne BMO İminlek Şurasında qaraw zarurlığı betärgä mömkin dide Frattini. Kiçä İran uran bayıtu eşen yañartuın iğlan itte. BMOnıñ xalıqara atom energiä idaräse elegräk İrannıñ atom programması mäs'äläsen BMO İminlek Şurasına tapşırğan ide. İdarä İran turında kiläse ayda yaña xisabın iğlan itkännän soñ İminlek Şurası İranğa qarşı çaralar kürü mäs'äläsen qarar dip kötelä. Biredä Rusiä tışqı eşlär ministrı Sergey Lavrov tağın ber märtäbä Mäskäwneñ BMOda İranğa qarşı çikläwlär kertü mömkinlegen xuplamawın belderep, bu bernigä dä kitermäs dip isäpläwen äytte.
XS
SM
MD
LG