Accessibility links

җомга, 9 декабрь 2016, Казан вакыты 06:54

Komunistlar Partiäseneñ Başqortstandağı citäkçelege tiräsendä butalçıqlıq


Xäbär itkänebezçä, şuşı yılnıñ 28 ğinwarında Başqortstan Prezidentı Xaqimiäte kürsätmäläre buyınça eş itüdä şik astına alınğan ber törkem Başqortstan kommunistları, fetnä kütärep digändäy, RF qompartiäseneñ Başqortstan bülekçäse plenumın cıyuların iğlan ittelär. Älege plenumda Başqortstan Prezidentına oppozitsiädä toruçı BR kommunistları resqomı citäkçese Rinat Ğäliev urınınnan töşerelde, anıñ urınına Vladimir Nesterov saylandı, digän qarar qabul itelgän ide. Ämma, Rinat Ğäliev häm anıñ tarafdarları bu plenum legitim tügel, şuña kürä anıñ qararları da yüridik köçkä iä tügel dip belderdelär. Ber ük waqıtta, Rinat Ğäliev citäklägän resqom byurosı äğzası Räis Säxäbetdinov ul plenumnı legitim tügel dip tanunı sorap Ufa şähäreneñ Kirov rayonı mäxqämäsenä möräcäğät itte. Ütkän atnada Mäskäwdän KPRF Üzäk qomitetınıñ ike tikşerüçese kilep xällär belän tanışıp kittelär. Häm menä 15 fevraldä Rinat Ğäliev qulına KPRF Üzäk qomitetınıñ da, Kirov rayonı mäxqämäseneñ dä qararları kilep kergän. KPRF Üzäk qomitetı qararında 28 ğinwarındağı “plenumnıñ” KPRF Ustawına qarşı kilüe bilgelänä, ä Ufanıñ Kirov rayonı mäxqämäse qararında plenum KPRF Ustawına yaraşlı ütkärelgän, dip raslana. Ber qarağanda älege cıyınnıñ legitimlığın açıqlaw hiç tä qatlawlı tügel, çönki KPRF Ustawında açıq itep plenumnıñ fäqät resqom byurosı qararı buyınça ğına cıyıla aluı berketelgän. Ä Rinat Ğälievqa loyällegen saqlağan resqom byurosı andıy qarar çığarmağan. “Kirov rayonı mäxqämäseneñ niçek itep öç yüridik ağaç arasında adaşuı berkemgä dä ser tügel”, -dide Rinat Ğäliev, östän telefon kürsätmäse buluına işarä yasap. Kärim Yawşev, Ufa.

XS
SM
MD
LG