Bu könnärdä Yekaterinburg şähärendä tuğan tel buyınça ölkä külämendä olimpiada uzdırıldı. Biredä rayon häm okrug külämendä uzdırılğan tatar, başqort, mari tele buyınça berençe ike turda ciñüçe balalar qatnaştı.
Sverdlovski ölkäseneñ könbatış okrugında tuğan tel buyınça uzdırılğan olimpiadada barısı altmışlap bala qatnaşqan. Ölkä külämendä köç sınaşırğa dip 11 tatar balası, 5 başqort, 3 mari balası kilgän.
Ölkä olimpiadası tarixında berençe tapqır bik qızıqlı xäl – Tübän Sırğa rayonı, Ufa Şiğere awılınnan kilgän Liliana Yunısowa beryulı tatar telennän dä, başqort telennän dä köç sınaştı. Sverdlovski ölkäse mäğärif üsterü institutı metodistı Zäytünä Şäymöxämmätova fikerençä, beryulı tatar telen dä, başqort telen dä öyränü bu balağa ölkä külämendä üzen tanıtırğa yärdäm itte.
Ufa Şiğere awılı mäktäbendä, çınlap ta, ber ük uqıtuçı ber ük balalarnı tatar telenä dä, başqort telenä dä uqıta. Ämma olimpiadada qatnaşuçı balalar arasında telne mäktäptä bötenläy öyränmägän balalar da oçrıy. Berezovskiy şähärennän kilgän, qatnaş ğailädä tuıp üskän qız bala Olesya Sazonova tatar telen däw änise arqılı belä. Rayon mäğärif bülege xezmätkärläre anı tabıp, inde ikençe yıl rättän ölkä olimpiadasına cibärälär. Olesya tatar telen centekläp öyränergä xıyallana, ämma ul yäşägän şähärdä tatar telen öyränü öçen yäkşämbe mäktäbe dä yuq.
Tatar telen mäktäp däräcäsendä tügel, öydä, ğailädä, üzlegennän öyränep, ölkä külämendäge olimpiadada qatnaşuçı tağın ike bala bar bulıp çıqtı. Alar Pervoural'ski şähärennän kilgännär. Ğomumi urta mäktäptä belem aluçı Marat häm Älfiäne okrugta uzğan olimpiadada klass citäkçeläre qatnaştırğan. Alarnıñ ciñep çığuın işetkän tatar yäkşämbe mäktäbe uqıtuçısı Gölnara İşanova balalarnı ölkä olimpiadasına alıp kilü öçen böten köçen quyğan.
Balalarnı alıp kilüçe uqıtuçılar söyläwençä, tuğan tel buyınça olimpiadada qatnaşuçı awıl balaları qayber qıyınlıqlarğa duçar bulalar. Rayon mäğärif bülekläre balalarnıñ yulına da, ölkä üzägenä yäşäw xaqın da tüläw cayın tapmıy. Şuña kürä matdi yaqtan awırraq yäşägän ğailä balaları kilä almıy qala. Kilgännäre dä ike-öç kön barğan olimpiadalarda toraq urını ezläp integälär.
Jyuri fikerençä, olimpiadada qatnaşuçı balalarnıñ äzerlek däräcäse bu yıl başqa yıllardağığa qarağanda yuğarıraq. Ölkä olimpiadasında ciñep çığuçılar Qazanğa häm Ufağa yul totaçaq.
Fäwiä Safiullina
Yekaterinburg
