Accessibility links

дүшәмбе, 5 декабрь 2016, Казан вакыты 03:36

“Dulqınnar” selkenep aldı


“Dulqınnar” bäygesen Cälilneñ yubiley uñayınnan “İdel” yäşlär üzäge uylap tapqan. Bäygene oyıştıruçılarnıñ berse, “İdel”yäşlär üzäge xezmätkäre Mörşidä Cihan söyli: - “Dulqınnar” konkursı 3 etapta ütä. Başta mäktäplärdä saylap aldılar, annan rayon külämendä balalar çığış yasadı. Bezgä iñ-iñnären berençe urın alğan balalarnı kiterdelär. Läkin aralarında ikençe, öçençe urın alğannarı da bar, çönki ber rayonnan dürt-biş keşe qatnaşuçı buldı. Qatnaşırğa teläweçеlär küp, jyuri äğzaları gel kiçkä qalıp tikşerep utıra almıylar. İkençe yılğa anıñ taläpläre dä kadgıyrak bulır. “Dulqınnarda” dulqınlanırğa respublika rayonnarı uquçıların cälep itkännär. Şulay uq Udmurtiä, Irınbur ölkäsennän dä yäşlär bar ide. Tatar tele-ädäbiätı, muzıka uqıtuçıları başta üz töbäklärendä rayon danın yaqlarlıq yäşlärne saylağannar. Xäzer menä bäygeneñ yomğaqlaw öleşendä, üzlärenä dan-xörmät kiterergä ömetle uquçılar, yäşlär Yazuçılar yortınıñ Tuqay klubında, Akterlar yortında, Qazannıñ teatr uçilişçesında köç sınaştılar. Andağı keşe, andağı yäşlär, alarnı citäkläp alıp kilgän apa-abıyları, barısı da mäş kilde. Başlanğıç sıynıf qızları apa-abıylarınıñ bolay itep söylä, tegeläy itep cırla digän süzlärennän qawşap cılap ta cibärälär. Annan tağın süzlären qabatlıy başlıylar. Çönki citäkçeläre, artqa çigenü yuq, bez rayon danın Cälil icatı aşa yaqlarğa tieşbez dip tuqıp toralar. Uqıtuçılar häm alarnıñ uquçıları şağir Musa Cälilneñ patriotik şiğerläre, cırları belän cenlängännär. Layış rayonı Stolbişçe mäktäbe uqıtuçısı Miläwşä Xäciewa bu xaqta bolay dip belderde: - Bez Musa Cälilne yaratqanğa, xörmät itkängä kildek. Äydägez, alarnıñ qılğan ğämällären üzläreneñ qaldırğan xezmätläre aşa bäyälik! Aña Nurlat rayonınıñ bäygedä qatnaşuçı näni qızçığı östäp: - Anı tatarnıñ Fuçiğı dilär!.. häm şiğerlärne niçek öyränüe turında da äytte: - Min başta üzem öyrängän idem. Ä annan soñ uqıtuçım bulıştı. Xislänep söylärgä, üzeñne bu şiğerdäge kebek xis itärgä quştı. Şiğri bäygedä Cälilneñ genä dä “Wäxşät” şiğeren ber 10 artıq qız-yeget söyläde, jyurida utıruçılar “Wäxşät”ne işetügä yartısın ğına söylägezçe tuqıp tordılar. Jyurida utıruçı yäş şağir Lenar Şäyex “Dulqınnarda” qatnaşuçı yäşlär xaqında bolay dide: - Ömetle yäşlär bar älbättä. Ämma qayber şiğerlär qabatlanıp kilä. Min alarğa artistizmnarına qarap, rol'gä kerep söyläwlärenä qarap baya birdem. Konkursta ciñüçe yäşlärne Qamal teatrı binasında qimmätle büläklär belän söyenderdelär. Röstäm İsxaqi

XS
SM
MD
LG