Accessibility links

шимбә, 10 декабрь 2016, Казан вакыты 17:50

Qazanda toz bette!


Rusiä şähärlärendä taralğan toz panikası xäzer Tatarstanğa da kilep citte. Ukraina Rusiäne tozsız qaldıra dip qurquğa töşkän qazanlılar da xäzer toznı paçkalap, qapçıqlap ala başladı. Xaqı öç-dürt tapqırğa artsa da bu aşamlıq Qazan kibetlärendä ozaq tormıy. Älegä qädär ber atna däwamında satıla torğan toz almağan toz xäzer ber mizgel eçendä yuqqa çıqtı. Satuçılar äytüençä, skladlarda da toz küp qalmağan. Ölkänräk keşelär mondıy xäl xätta Sovet zamanında bulmadı dip zarlana. Suğışta qatnaşuçılar toznı kiemgä, xätta altınğa alıştıruın xäterli. Xäyer, bügen andıy uq xälgä citkermäslär xalıqnı. Şulay da Qazanda çınlap ta toz betäme? Qazan kibetlärendäge satuçılarnı tıñlıyq:

-Bezdä toz öçençe kön bette. 4 sum tora ide ul. Keşelär 20şär paçka aldı! Qimmätlänäçägen belgännär inde. Öçençe könne üzem bazarda buldım, anda toz biş sum tora ikän. Bezneñ kibettä bar dip almadım. Ä üzebezdä betkän ikän! Xäzer yaña bäya belän kiläçäk inde ul. Äle menä işettem 22 sumğa satalar dip! Qaya barabız, alabız inde.

-Bezdä toz kiçä bette. 3сум 50 tien tora ide ul. Xalıq bik küp aldı anı. Televizor qarap şundıy näticä yasağannar inde üzlärençä.

Respubliqa citäkçeläre isä toz betä dip borçılunı ğomumän nigezsez dip sanıy. Qazannıñ qullanu häm xezmät kürsätü Komitetı citäkçese İrek Dautov äytüençä, şähärdä toz küp häm “Bäxetle”, “Ramstor” başqa supermarketlarda, zur kibetlärdä häm küpläp sata torğan bazarlarda anı alırğa bula. İrek Dautov Qazanda toz betü problemasın yasalma dip sanıy häm Rusiä üzägendä tozğa bulğan ajiotajdan qullanuçı, fayda kürüçe eşmäkärlär, satuçılarğa caza birergä kiräk di. Şähärneñ qullanu häm xezmät kürsätü Komitetı citäkçese äytüençä, bu könnärdä Qazanda tozğa moxtaclıq bulsa da, bik tizdän şähär kibetläre yañadan toz belän tutırılaçaq.

“Kazantoz”ı aksioner cämğiäte wäkile isä Tatarstanda tozğa ajiotaj tuuda jurnalistlarnı ğayıpläde. Anıñ fikerençä, tozğa moxtaclıq mäğlümat çaralarınıñ Rusiä üzägendäge xällärne tasfirlaudan barlıqqa kilgän. Respublika citäkçelege mäs’äläne waqıtında xäl itmäwendä jurnalistlar ğayıple bulıp qaldı.

Ä Rusiä şähärlärendä xäzer toz ğına tügel, ä şikär, makaron, xätta şırpısına qädär ajiotaj barlıqqa kilä. Qayber belgeçlär bu tovarlarnı tizräk satu öçen maxsus eşlänä di. Tik menä şul uq toznı kiläse yılda aluçılar küp bulır mikän?

Al'bina Zäynulla

XS
SM
MD
LG