Accessibility links

пәнҗешәмбе, 8 декабрь 2016, Казан вакыты 01:20

Başqortstan wäkillege Qazaqstanda eş säfärendä buldı


Başqortstan Respublikası räsmi wäkillege atnakiç könne Qazaqstan Respublikasına eş säfärenä kitkän ide. Başqortstan Premyer-ministrı urınbasarı, BR iqtisadi üseş häm sänäğät ministrı Niqolay Puçnin citäkçelegendäge bu wäkillek comğa könne dä Astanada üzeneñ säfäre programması qısalarındağı çaralarda qatnaştı.

Başqortstan wäkillege eçenä qayber ministrlıylar citäkçeläre, rayonnar häm şähärlär xakimiätläre başlıqları belän bergä zur şirkätlär citäkçeläre häm kiñ eşquarlar da kergän ide. İke respublika arasında üzara faydalı iqtisadi bäyläneşlärne arttıru maqsatın quyğan bu säfär barışında yaqlar baytaq qına oçraşular häm söyläşülär ütkärde, qayber täğäyen kileşülär tözü öçen niätläre belän urtaqlaştı.

Säfärneñ töp möhim çarası berençe könne ük ütte. Astanada “Başqortstan Respublikası sänäğäte könnäre” dip isemlängän maxsuslaştırılğan sänäğät kürgäzmäse açıldı. Andağı şähär Kongress-xoll binasında Başqortstannıñ illedän artıq şirkäte tavarları urın aldı. Kürgäzmä açu tantanasınnan soñ, ike respublikanıñ eşlekle dairäläre üzara alış-bireşlär xaqında söyläşülär ütkärde.

Başqortstan Xökümäte matbuğat üzäge xäbärenä kürä, respublika räsmi wäkillege comğa könne Qazaqstan Respublikasınıñ berniçä ministrlıysında oçraşular ütkärgän häm Astana şähäre xakimiätendä, şulay uq Başqortstannıñ Qazaqstandağı Wäkilçelegendä bulğan. Şulay itep kiläçäkkä ike yaqlı xezmättäşlekne kiñäytügä etärgeç biräçäk bu säfär comğa kiçen tämamlandı.

Fänis Fätxi, Ufa

XS
SM
MD
LG