Accessibility links

чәршәмбе, 7 декабрь 2016, Казан вакыты 15:41

Başqortstanda başqort telen uqıtu qarşılıqqa oçrarğa mömkin


Uzğan programmabızda xäbär itelüençä, Ufa şähärendäge barlıq 160 mäktäptä dä yaña uqu yılınnan här millät balalarına başqort telen öyrätü başlanaçaq. Bu xaqta Ufa şähäre xakimiäte başlığı urınbasarı Sıntimer Bayazitov çärşämbe könne uzdırğan matbuğat oçraşuında xäbär itte. Elegräk tä xäbär itelüençä, bıltır noyäber ayındağı färmanı belän Başqortstan mäğärif ministrı Zöhrä Räxmätullina da böten Başqortstan mäktäplärendä başqort bulmağan başqa millät balalarına da başqort tele öyrätä başlawnı räsmi nığıtıp quyğan ide. İnde menä bu färmannıñ şuşı yıldan Ufada çınlap ta tormışqa aşırıla başlayaçağı xaqında kisterep äytelde.

Başqortstannıñ Mäğärif turındağı qanunına respublika parlamentı tarafınnan uzğan yılda tözätmälär kertelep, anda başqort telen mäcbüri uqıtu xaqında süzlär yazılğaç, bu ğämälgä respublikada yäşäwçelärneñ rizasızlığı sizelä başlağan ide. Ufada ütkän törle mitinglarda häm piketlarda da açıq kürende. Ayıruça tatar milli oyışmaları wäkilläre üz möräcäğätlärendä häm belderülärendä bu eşneñ döres bulmawın assızıqladı. “Başqort telen añlaw öçen tatarğa başqort telen maxsus öyränü kiräkmi, ä başqa millätlär balaları başqort telen öyränäse kilä ikän, bu eş tä alarnıñ teläge buyınça ğına eşlänergä tieş”. Şulay dip isäpli Başqortstandağı yegermegä yaqın oyışmanı berläşterüçe Tatar cämäğätçelek oyışmaları berlege wäkilläre. Ämma bu fiker belän respublikadağı qayber tatar ğalimnäre kileşep betmi. Küp yıllar Başqortstan däwlät universitetınıñ tatar tele bülegendä möğallim bulıp eşlägän tanılğan ğalim Äxät ağa Niğmätullin da şular isäbennän. “Başqort telen başqa millät balalarına da öyrätü omtılışınnan taciğa yasarğa kiräkmi, - di Äxät ağa. – Atnağa ike säğät başqort telen öyränüdän dönya cimerelmi. Älege mäs'älädä tatar milli oyışmalarınıñ da, ruslarnıñ da kisken mönäsäbättä toruı añlaşılmıy”.

Başqortstandağı tanılğan tatar ğalime Äxät Niğmätullin fikerlären işettegez. “Başqort telen uqıtu tatar tele däreslären beterü isäbenä bulmasa, nigä moñardan qurqırğa häm aña qarşı kilergä”, - di Äxät ağa. Bu mäs'älädä anıñ belän Başqortstandağı qayber başqa tatar ğalimnäre kileşmäskä dä mömkin, älbättä. Häm, ğomumän, äle bu mäs’äläneñ kiläçäktä dä şaqtıy nıqlı qarşılıqqa oçrawı bar. Monısı inde yaña uqu yılı başlanğaç açığraq kürener.

Fänis Fätxi, Ufa

XS
SM
MD
LG