Accessibility links

сишәмбе, 6 декабрь 2016, Казан вакыты 21:05

Oppozisiä qarşılıq çaralarına äzerlänä


Başqortstannıñ Berläşkän oppozisiäse koordinasiä şurasınıñ bu atnanıñ çärşämbesendä ütkärgän kiñäşmäse xaqında xäbär itkän idek inde. Anda qatnaşuçılar 4 martta Ufada qarşılıq çarası ütkärergä kileşte. Oppozisiä köçläreneñ bıyıl kiñ qolaçlı oyıştırıluçı şundıy täwge uram cıyınında, nigezdä, ike mäsälä kütäreläçäk. Berençese- toraq-kommunal xezmätlärgä xaqlarnıñ bik nıq artuına rizasızlıq, ikençese – Başqortstanda keşe xoquqları bozıluğa cämägätçelek iğtibarın tağın ber qat cälep itü. Başqortstanda uram cıyınnarın ütkärü xaqında bıltır qabul itelgän yaña qanun nigezendä mitinglarğa çığu xäzer qatlawlı eşkä äylände. 500dän artıq keşe qatnaşa torğan cıyın ütkärü öçen xäzer respublika xökümätenä möräcägät itärgä kiräk. Başqortstan Berläşkän oppozisiäse koordinatsiä şurası räise häm ber ük waqıtta Başqortstan Tatar milli-mädäni moxtariäte citäkçese wazıyfaların başqaruçı Ramil Bignov süzlärençä, comğa könne respublika xökümätenä şul möräcägät tapşırılğan. Aña nindi cawap alınaçağı mäğlüm tügel. Möğayın, 4 martqa bilgelängän qarşılıq çarasın oyıştıruğa rizalıq birmäskä dä mömkinnär, di Ramil äfände. Yä inde rizalıq birsälär dä, Ufa şähäre xaqimiäte qarşındağı bez sorağan üzäk mäydanda tügel, ä qaydadır xalıq az yörgän ber çittä genä genä birüläre ixtimal . Niçek kenä bulsa da, oppozisiä köçläre mart başındağı berençe kiñ qolaçlı uram cıyınına äzerlekne bügennän ük başlağan. Anı oyışqan töstä ütkärü turında söyläşü öçen, comğa könne çirattağı kiñäşmä ütkän. Bu xaqta Başqortstan Tatar milli-mädäni moxtariäte räise urınbasarı Mäcit Xucin xäbär itte. Alay ğına da tügel. 4 mart könne tağın ber cıyın ütäçäk, di Mäcit äfände. Ufa tatar milli-mädäni moxtariäte bu könne piket ütkärergä cıyına. “Anda Başqortstan tatarları problemnarı kütäreläçäk, - di Mäcit Xucin. – Tatarlarnıñ milli-mädäni ixtıyaclarına bernindi iğtibar birelmi. Şuña kürä dä bu mäsälälärgä dä cämägätçelek iğtibarın cälep itärgä kileşende”. M. Xucin: "Bez bu piketqa 18 lozung alıp çığarğa dip kileştek. Alar barısı da Başqortstan tatar xalqı mänfägätlären küz uñında totıp yazılğan. Respublikada tatar balaları üz telendä belem alırğa tieş. Tatar xalqı üz mädäniäten üsterü mömkinlegenä iä bulırğa tieş. Prezident Räximov isemenä dä belderülärebez bar." Kiläse atnada tatar milli oyışmaları 4 martta ütäçäk piketqa äzerlek barışın tikşerü öçen tağın ber utırış ütkäräçäk.

Fänis Fätxi, Ufa.

XS
SM
MD
LG