Accessibility links

якшәмбе, 11 декабрь 2016, Казан вакыты 13:00

Wafirä Ğizzätullinanı iskä alu kiçäsenä cırçınıñ iñ yaqınnarı ğına cıyıldı


Üzebez xäräkäte oyıştırğan bu istälek kiçäsenä cırçınıñ dusları, icattaşları, anı yaqınnan belep, yaratqan keşelär genä cıyıldı. Çarada Nurulla mäçete imam-xatıybı Ğabdulla xäzrät Ğaliulla, jurnalist Fäniä Xuciäxmät, cämäğät eşleklese Zöhrä Aysina, Tatar ictimaği üzäge räise Tälğät Bariev häm başqalar üzläreneñ istälekläre belän urtaqlaştılar. Kiçä Ğabdulla xäzrätneñ doğa uquınnan başlanıp kitte.

Annarı Wafirä Ğizzätullinanı yaqınnan belüçelär üzläreneñ cırçığa bäyle istäleklären, anıñ belän bulğan qızıqlı oçraqlar turında söylädelär. Tanılğan jurnalist Fäniä Xuciäxmät Wafirä xanım belän yaqınnan dus bulğan.

Zöhrä Aysina isä üzeneñ Wafirä Ğizzätullina belän soñğı oçraşuı turında söyläde.

Ülärenä 3 kön qala min anıñ oçraştım. Döresen genä äytkändä, anıñ üzen bu dönyada xis itmäwe yözendä çağıla ide inde. « Zöhrä, min tizdän kitärmen inde, minem nindider sizü bar. Äni dä mine üze yanına çaqırdı, qızım menä şuşında urın, sin inde kilergä tieş, dide»

Kiçädä qatnaşuçılar cırçınıñ tuuına 60 yıl tulu uñayınnan Qazanda bernindi dä çara uzdırılmawğa, Wafirä xanımnı berniçek tä iskä almawğa bik borçıldılar. Xäyer, xakimiät tarafınnan bernindi kiçä, konsertlar ütkärelmäsä dä, xalıq üzeneñ yaratqan cırçısın onıtmıy. Cırçınıñ istälegen mäñgeläşterü eşlären isä Milli mäcles alıp bara ikän. Şuşı yünäleştäge eşlär turında cıyıluçılarğa Zöhrä Aysina söyläde.

Milli mäcles qararı buyınça bez cırçı istälegenä märmär taqta quyarğa buldıq. Annarı Qazan xakimiätenä şähärneñ ber uramına Wafirä Ğizzätullina isemen birergä kiräk digän täqdim belän çıqtıq. Mart başında cırçınıñ istälek kiçäsen dä ütkärergä niätlibez

Monnan tış, üzebez xäräkäte Mädäniät ministrlığına cırçınıñ cırlar tälinkäsen çığaru kiräklege turında möräcäğät itte.

Wafirä Ğizzätullinanı iskä alu kiçäsendä şulay uq çäy eçü, cırçınıñ 1996 yaldağı konsertınıñ yazmasın qaraw da buldı. Çara Wafirä xanımnıñ qızı Kamiläneñ räxmät süzläre belän tämamlandı.

Gölnaz İlgizär

XS
SM
MD
LG