Accessibility links

Tatarstan matbuğatı yubileylarnı yaqtırta


Bu aralarda Tatarstanda yubileylar bik küp bilgeläp ütelde. Älege istälekle datalar respublika matbuğatında da çağılış tapmıy qalmadı, älbättä. İğtibar üzägendä berençe çiratta Musa Cälilneñ 100 yıllıq yubileyı buldı. Şuşı datağa bağışlanğan yazmalar böten diärlek gäcit-jurnallarda da dönya kürde. Tatarstan jurnalı, mäsälän, üzeneñ fevral’ sanında Rafail Mostafinnıñ Moabit däftärenä bağışlanğan yazmasın urnaştırdı. Şunda uq Vil İbrahimov şağirneñ tuğan yağı – Orenbur ölkäseneñ Mostafa awılı, Musanıñ bala çağı turında yaza. Maxsus Tatarstan jurnalı öçen Cälilneñ qızı – Çulpan Cälilovanıñ ätise xaqındağı istälekläre dä urın alğan. Şuşı mäqälädä şağirneñ qızına häm xatınına yazğan xatları da bastırılğan. Jurnalda şağirneñ ulı – Al’bert Cälilovnıñ istälekläre dä urın alğan. Rämis Äymät yazmasınnan uquçılar Cälilneñ tağın ber ğailäse – xatını Rawza Xismätullina häm ulı Al’bert turında belä ala.

Mäğrifät gäciteneñ 18 fevral’ sanı isä tulısınça diärlek Musa Cälilgä bağışlanğan. Monda yubiley uñayınnan basma ütkärgän bäygeneñ näticäläre häm cawapları urın alğan. Şağirneñ icatı xaqında professor Xatıyp Miñneğulov yazması da urın alğan gäcittä. Ğalim Cälilneñ iñ bilgele äsärläre turında yaza, alarğa üzeneñ añlatmaların birä. Şulay uq Mäğrifät üzeneñ uquçıların İdel-Ural legionı belän tanıştıra. Bu xaqta İdel-Ural legionı kitabı avtorı İskändär Ğiläcev söyli.

Şunısın da äytergä kiräk, Musa Cälil yubileyı uñayınnan matbuğatta İdel-Ural legionı, şağir belän bergä äsirlektä bulğannar xaqında da mäğlümät alırğa mömkin ide. Ä menä Şähri Qazan gäcitendä bu könnärdä İdrisilar ğailäsenä bağışlanğan qızıqlı ber mäqälä dönya kürde. Rafail Mostafin üzeneñ yazmasında Germaniädä yäşägän millättäşebez Ğalimcan İdrisi häm anıñ ğailäse turında yaza. Avtor fikerençä, İdrisilar yazmışı Musa Cälil tormışına qağılışı bulğan öçen genä tügel, ä millätebez tarixında bilgele ez qaldıruçılar bularaq ta iğtibarğa häm ixtiramğa layıq. Çınlap ta, Ğalimcan İdrisi Germaniädä yäşägän möselmannarına, berläşterä, alarğa matdi yärdäm oyıştıra, din däresläre birä. Älege qızıqlı şäxeslär turında tulıraq itep sez Şähri qazan gäcitennän uqıp belä alasız.

Musa Cälilneñ yubileyınnan tış, başqa istälekle datalar da iğtibarsız qalmadı. Şuşı atnada dönya kürgän Mädäni comğa uquçılarğa kompozitor Aleksandr Klyuçarev turında yazma täqdim itä. Tatar muzıkasın üsterügä zur öleş kertkän älege kompozitornıñ tuuına bıyıl 100 yıl tula. Ul bezneñçä moñlana ide digän yazmasında avtor Nuriä Juraeva Klyuçarevnıñ tatar xor kul’turasın üsterüe, Tatar däwlät cır häm biü ansamblen tanıtudağı xezmätläre xaqında yaza.tatrstannıñ xalıq artıstı Ramil Kuramşin isä Yuqsınu rubrikasında cırçı Wafirä Ğizzätullinanı iskä ala. Bıyıl cırçığa 60 yäş tulğan bulır ide. Ramil Kuramşin monda Wafirä xanımnıñ icatı turında istälekläre belän urtaqlaşa, üzläreneñ bergä konsert quyıp yörüläre, cırçınıñ milli xäräkätkä quşılıp kitüe xaqında yaza. Şulay uq Mädäni comğada tatar jurnalistikasın üsterügä zur öleş kertkän şäxes – Florid Äğzämov xaqında da yazma urnaştırılğan.

Gölnaz İlgizär

XS
SM
MD
LG