Accessibility links

якшәмбе, 4 декабрь 2016, Казан вакыты 09:17

Fälestin parlamentı wazifasına kereşte: Xamas İzrailne tanudan baş tarta


Fälestin citäkçese Mahmud Abbas parlamentta küpçelekne täşkil itkän Xamasnı yaña xökümät tözergä soradı. Abbas şulay uq Xamasnı İzrail belän tınıçlıq kileşülären tanırğa çaqırdı, bu çaqırunı Xamas şunda uq kire qaqtı.

Gaza şähäre häm Ramallada bulğan Xamas citäkçeläre häm fälestinnär başlığı Abbas – video elemtä yärdämendä tarixi söyläşü uzdırdı. Tarixi, çönki terror höcümnäre öçen cawaplı bulğan suğışçan Xamas törkeme uzğan ayda saylawlarda ciñep bügen parlamentta utıra.

Abbas Xamasnı yaña xökümät tözüne soradı, häm köntärtibendä berençe çiratta millät mänfäğätläre bulırğa tieş, dip östäde. Ämma fälestinnär başlığınıñ suğışçan törkemgä taläpläre dä bar. Abbas, Hamasnıñ İzrail belän solıx kileşülären tanuın, däwlätçelekne söyläşülär yulı belän tözüen taläp itte.

Anıñ bu süzlären Fatah firqasendäge tarafdarları alşıqlarğa kümsä – Hamastan başqa törle reaksiä buldı. Hamas räsmiläre, yähüd däwläten ber qayçan da tanımayaçaqların, İzrailne yuq itü eşen däwam itäçäklären belderde. Törkemneñ Gazadağı yulbaşçısı Mahmud Zahar, bu mömkin tügel, dide:

"Söyläşülär yulınıñ berdänber çara buluı belän bez qänäğät tügel. Bez İzrailne partnerıbız itep qabul itmibez häm İzrailneñ legal däwlät buluın tanımıybız."

2000nçe yıldan birle Xamas İzrailgä qarşı 60qa yaqın intixar höcümen oyıştırğan. AQŞ häm Yevropa Xamasnı terror oyışmaları isemlegenä kertkän, häm alar ägär dä Xamas İzrailneñ tanımasa häm köç qullanudan baş tartmasa – fälestinnärgä yardämne tuqtatu belän yanıy.

Fälestinnärneñ baş aradaşçısı Saeb Erekat, ägär dä Xamas citäkçelegendäge xökümät Abbasnıñ tınıçlıq säyäsätennän çitläşsä – zur krizis tuaçaq, dip belderde. Yäkşämbe, 19 fivral könne İzrail xökümäte cıyıla. Ministrlar – Xamas citäkçelegendäge xökümätkä qarşı çaralar kürü mäsäläsen qarıyaçaq. Alar arasında Gazadan İzrailgä eşkä kilüçelärne, tawarlarnı kertmäw kebek çikläwlär bula ala.

alsu qormaş
XS
SM
MD
LG