Accessibility links

җомга, 2 декабрь 2016, Казан вакыты 22:53

Sеmbеr ölkäsendä milli tellär bäygese uzdı


Ul, yıldağıça, Dmitrovgrad şähärennän yıraq tügel urnaşqan «Yunost'» isemle Mäğärif idäräse qaramağındağı balalarnı sälämätländerü üzägendä oyıştırıldı.

Ütkän yıllardağı şikelle, bıyıl da monda tatar, çuaş, muqşı sıynıflarında belem aluçı balalar ana telennän häm rus telennän belemnären kürsättelär. Tatar tele häm ädäbiätennän bäygedä barlığı 39 bala qatnaştı: şularnıñ 14е – 9 nçı sıynıftan, 10 sı – 10 nçı sıynıftan, 15е – 11 nçe sıynıftan.

Bu yulı, elekke yıllardan ayırmalı bularaq, olimpiadağa 9 ir bala da kilgän, häm şuşı uquçılar da üzläreneñ belemnären yarıysı ğına däräcädä kürsättelär. Alar arasınnan Ul'yan şähäreneñ 55 nçe mäktäbe uquçısı Dänis Saitov ayıruça iğtibarğa layıqtır. Danis bıyıl köçle awırıp kitä, şul säbäple mäktäpkä dä ozaq qına waqıt bara almıy. Tik bu awırlıqlar aña bäygegä äzerlänergä qomaçawlamıy, kiresençä, ul uqıtuçısınnan anı cibärülären ütenä. Bäyge barışında da sınatmadı, biremnärne äybät kenä ütäp, büläkkä layıq bula.

Bäyge ike kön däwamında bardı. Berençe könne qatnaşuçılar - tel buyınça biremnärgä, ä ikençe könne ädäbiätkä qağılışlı biremnärgä cawap birdelär. 3 nçe kön - näticälär köne dip iğlan itelde. Bu könne här uquçı ayıruça zarığıp kötte. Bäyräm uñayınnan balalar tatar, çuaş, muqşı köylärennän, biyüllärennän torğan bäläkäy genä konsert äzerläp quyğannar.

Ciñüçelärgä kilgändä, alar barısı da awıl balaları. Mäsälän 9 nçı sıynıflar arasında 1 nçe urınğa İske Kulatka rayonınıñ İske Atlaş mäktäbe uquçısı Läysän Yafarova layıq buldı. 10 nçı häm 11 nçe sıynıflardan Yaña Malıqlı rayonınıñ İske İsäntimer uquçısı Räisä Şäräfetdinova häm Çardaqlı rayonınıñ Abdulla awılı uquçısı Ğäliä Zaynullova berençe buldılar.

Ul'yan ölkä mäğärif departamentınıñ baş belgeçe Fedosiä Ulendeevanıñ äytüençä, ölkä külämendä ciñüçelär tizdän Qazan, Çabaksar, Saransk şähärlärendä uzdırılaçaq regional' bäygedä qatnaşaçaqlar.

Çulpan Firğalieva, Sember.

XS
SM
MD
LG