Accessibility links

якшәмбе, 4 декабрь 2016, Казан вакыты 21:35

“Tatmoststroy” şirkäte citäkçese Äbulğaz Soltanov wafat buldı


Düşämbe könne köndezge säğät ikedä Qazan şähäre yanındağı Qorı yılğa ziratında bilgele injener häm citäkçe Äbulğaz Soltanov cir quyınına salındı.

Äle uzğan atna axırında ğına “Tatmoststroy” şirkäte citäkçese Äbulğaz Soltanov saw – sälämät, yaxşı käyef belän tuğan yağına yalğa qaytıp kitkän. Talantlı häm köçle citäkçe ğömerendä bik küp qatlawlı xällärgä dä oçrap, isän – imin qalu yulın taba alğan. Ul tözegän yortlar häm küperlär bersennän – berse biek häm tözeleş qarap toruğa xäwefle bulıp kürensä dä, bu yulı bälä kötelmägän yaqtan kilgän.

Şimbä könne Başqortstannıñ Baltaç rayon administratsiä başlığı Ayrat Mägzümov häm Qazannan qaytqan yaqtaşı Äbulğaz Soltanovnıñ oçqıç qazasına duçar buluı mäğlüm buldı. Alar “Robenson - R 44” xosusi boralağı belän cirgä töşep häläk bulğannar. Ğadättän tış xällär ministrlığı mäğlümatlarına qarağanda, “Resurs A” xosusi şirkäteneñ milkendä bulğan boralaq, oçuçı xatası näticäsendä bälägä oçrağan. Bu bäläneñ öçençe könendä, yäğni düşämbedä, möselman qağidäläre buyınça märxüm Äbulğaz Soltanov cirlände. Qazan yanındağı Qorı yılğa ziratı märxüm yäşägän yortqa iñ yaqın urın bulğan. Ozaq yıllar buyı Tatarstan küperläre dip atalğan zur oyışmanı citäklägän Äbulğaz Soltanov tözüçelär häm idäräçelär arasında abruylı şäxes ide. Yul tözü kebek küp çığımnar häm ostalıq taläp itüçe bu tarmaq häm ğomumän respublika öçen Äbulğaz Soltanovnıñ häläk buluı zur yuğaltu. Yäkşämbe häm düşämbe könnärendä gäzitlär häm operativ xäbärlär tapşırular bu faciğäne yaqtırtırğa ölgerä almıy qaldı. Şunı äytergä kiräk, xosusi boralaqta häläk bulu soñğı arada ğına Tatarstanda ikençe oçraq.

Gölnaz Şäyxetdin

XS
SM
MD
LG