Paqstan Yevropa Berlegen, İslam häm başqa dinnärne mısqıl itkän mäğlümatlär birgän basmalarğa qarşı tsitat "tieşle" qanunnar qabul itergä çaqıra. Bu belderüne tışqı eşlär ministrlığınıñ matbuğat wäkile Tasneem Aslam yasadı. Brüsseldä säfärdä bulğan İran tışqı eşlär ministrı Manuçehri Mottaqi, soñğı atnalarda keşelärneñ ülemenä kitergän, Möxämmäd päyğämbär räsemnärenä qarşı uram cıyınnarın tuqtatırğa çaqırdı. Rim papası Benedikt, tınıçlıq häm üzara añlaşu öçen – dönyadağı barlıq dinnärne xörmät itü kiräk, dip belderde. İrandağı Daniä ilçelege qarşına räsemnärgä qarşılıq belderep bügen İran talibäläreneñ zur bulmağan törkeme cıyılğan ide, Äfğanstannıñ könçığışındağı Cälälabad şähärendä 2 meñgä yaqın student tınıç uram cıyını uzdırğan. İrannıñ yarım räsmi Mehri xäbär agentlığı mäğlümatlärenä qarağanda, Holokostnı kimsetkän räsemnärgä bäyge iğlan itkän internet säxifäsenä uzğan ike atnada 14 million keşe kerep qarağan. Säxifäneñ adresı irancartoon.com. İñ yaxşı Holokost karrikaturın icat itüçegä 12 meñ dollarlıq büläk wäğdä itelä. Mondıy bäyge Möxämmäd päyğämbärne kimsetlän räsemnär Yevropa gazetlarında basılıp çıqqannan soñ, İranda çığuçı köndälek Hamşahri basması tarafınnan iğlan itelgän ide.
