Accessibility links

дүшәмбе, 5 декабрь 2016, Казан вакыты 21:51

Rinat Zakirov: din ähelläreneñ berdämlege millätne saqlar


Uzğan yılda Bötendönya tatar kongressı İslam häm millät mäs’älälärenä qağılışlı Bötenrossiä fänni-ğamäli konferensiä oyıştırğan ide. Şunnan birle Bötendönya kongress qarşında Din eşläre buyınça komissiä eşli başladı. Anıñ räise bulıp kongress citäkçese Rinat Zakirov saylandı. Sişämbedä kongress binasında älege Komissiäneñ berençe utırışı ütte. Anda Rusiäneñ möftilär Şurası räise Rawil Gaynetdin, Ufadağı Üzäk Diniä Näzaräte räise Tälğät Tacetdin, Tatarstan möftie Ğosman İsxaqi dä qatnaştı. Sişämbedä, cıyında qatnaşuçılar 2006 yılğa eş planı tözedelär. Bu xaqta Bötendönya tatar kongressı räise Rinat Zakirov söyli:

Cıyınnı bez Tatarstan möftie bulıp yañadan saylanğan Ğosman xäzrät isxaqinı qotlawdan başlap cibärdek. Şulay uq bıyıl eşlänäse eşlärneñ planın da tikşerdek. Din ähellärebez arasında berdämlek bulsa, alar Rusiä cirendä tatar xalqınıñ böten yolaların, telen saqlap, bügenge säyäsättä, cämğiättä barğan protsesslarğa üz yoğıntısın kertsä, alar şunıñ belän millätebezne dä saqlar.

Kongress qarşında eşläwçe din eşläre komissiäseneñ berençe utırışında kütärelgän qayber möhim mäs'älälär turında Ufadağı Üzäk diniä Näzaräte räise Tälğät Tacetdin fikere:

Komissiä utırışınıñ ähämiäte - dini häm ictimaği oyışmalarnıñ berdäm eşläwendä, xalıq belän yaqınraq buluıbızda. Armiädä pravoslau dine tarafınnan künderelgän dini keşelär bar, anda imamnarnı da cibärü turında fiker alıştıq bügen, şulay uq dinne mäktäplärdä uqıtu turında häm başqa mäs'älälär qaraldı.

Ser tügel, Rusiäneñ möftilär şurası häm Ufadağı Üzäk Diniä Näzaräte arasında qarşılıqlar küp. Ämma Bötendönya tatar kongressı şuşı oyışmalarnıñ wäkillären ber Komissiägä tupladı häm alarnıñ eşçänlegen berläşterü yunäleşendä eşli.

Kongresstağı cıyınnan soñ Komissiä utırışında qatnaşuçılar Qol Şärif mäçetendäge İslam dine muzeen açuda qatnaştı. Tälğät Tacetdin däwam itä:

Dönya niqädär global’läşä barsa da, xalıq tarixı belän qızıqsına, anı añlarğa tırışa. Ä uzğan tarixın belgän xalıq üz qäderen dä tanıy häm yuğalmas ul.

Ufadağı Diniä Näzaräte räise Tälğät Tacetdin buldı.

Al'bina Zäynulla

XS
SM
MD
LG