Accessibility links

чәршәмбе, 7 декабрь 2016, Казан вакыты 01:01

Omskida milli oyışmalar xisap tota


İnde yaña yılnıñ ikençe ayı ütep barsa da, çärşämbe könne “Duslıq yortında” yıllıq xisap cıyılışı ütte.

Mäğlüm bulğança, älege “Duslıq yortı” Omskida 1997 yılda gubernator qararı belän buldırılğan ide häm bu mädäniät uçrejdeniese eşçänlegen dä ölkä başlığı tarafınnan raslanğan programma buyınça alıp bara. Omskidağı milli-mädäni oyışmalarnıñ da küpçelege “Duslıq yortı” qaramağında eşli. Yıl axırında alar başqarılğan eşlären baştanayaq sanap çığıp bu uçrejdenieneñ citäkçeläre aldında xisap totalar. Xisap cıyılışında isä “Duslıq yortı” direktorı ğomumi näticälär yasap, ğomumi sannarnı yañğıratıp, uñışlarğa tuqtalıp, alda torğan plannar belän urtaqlaşıp ozın ğına notıq tota.

“Duslıq yortı” direktorı Natal'ya Stepanova: älege xisap cıyılışındağı çığışında, milli üzäklär belän bergäläp 1265 çara ütkärelde, balalar öçen 214, 180 meñ keşe tamaşaçı buldı,- dip bilgeläp ütte.

Direktor süzlärençä, törle millätlärneñ mädäniäten üsterü östendä eşlär uñışlı bara. Yıl äylänäsendä 5 seminar ütkärelgän, şul isäptän berse tatar fol'klorı buyınça, üzeşçän sänğät kollektivlarınıñ sanı artqan, metodik säbäplär cıyıla, fotoräsemnär, qullanma sänğät eşläre kürgäzmäläre oyıştırıla, milli bäyrämnär ütkärügä iğtibar arta, kalendar' bäyrämnäre dä ontılmıy häm başqa bixisap eşlär eşlängän. Töbäqära häm xalıqara elemtälärneñ üseş ala baruı da assızıqlandı anda, bu yünäleştä tağı da eşlärgä kiräk dielde.

Natal'ya Stepanova, festival'lär, konsertlar ütkärü belän genä çiklänergä yaramıy, digän fiker dä belderde. Anıñ süzlärençä, alda torğan möhim çara – Seberdä yäşäwçe xalıqlarnıñ forumın ütkärü.

“Duslıq yortı” direktorı urınbasarı Ol'ğa Kuleşova tatar moxtäriäteneñ eşçänlegenä tuqtalıp, aña yuğarı bäyä birde, Novosibirski häm Semipalatinski şähärlärendä ütkärelgän festival'lärdä, konkurslarda qatnaşuların uñay küreneş dip bäyäläde.

Xisap cıyılışında “Ölkän buın” dip isemlängän maqsatlı programma turında süz quzğatıldı. Tögälräk añlatuın sorap min Ol'ğa Kuleşovaka möräcäğät ittem.

Berniçä yıl elek “Ölkän buın” maqsatlı programması barlıqqa kilde, bez anda täqdim kerttek – kostyumnar alırğa, häm menä tatar kollektivına külmäklär häm bayan alındı, -dide direktor urınbasarı.

Ämma bu zatlı itep tegelgän säxnä külmäklären, ay kürde, qoyaş aldı, digändäy, “Umırzaya” ansamblenä yörüçelärgä kürsättelär dä, zur çaralarda ğına biräçäkbez, dip “Duslıq yortı”nıñ ber bülmäsendä yozaq astına salıp quydılar. “Umırzaya” artistları isä üzläreneñ Tamir Alimbaev tektergän, häm küptän tügel Seber yağı möftie Zölqarnäy xäzrät Şakircanov yärdäme belän üzläre tekkän ğadiräk külmäklärendä çığışlar yasıylar. Alınğan bayannıñ da äle ansambl' bayançısı qulına kilep eläkkäne yuq.

Axırda Ol'ğa Kuleşovadan, 2006 yılda tatarlar öçen nindi çaralar qaralğan,- dip soradım.

2006 yılda tatar-başqort mädäniäte könnäre ütkäreläçäk, anıñ qısalarında Tara şähärendä “Yaña yoldız” balalar cır konkursı häm seminar ütäçäk, dide “Duslıq yortı” direktorı urınbasarı Ol'ğa Kuleşova.

Tağın ber xäbär. Omskida tatar yäşläre öçen yal kiçäläre “Fäniä” yäşlär oyışması tarafınnan, cäy könnären isäpkä almağanda, daimi oyıştırılıp tora. Oyışma citäkçese Dinara Başirova süzlärençä, yäşlär anda tatar, rus, ingliz muzıkasına biilär, törle, şul isäptän milli uyınnar oyıştırıla, tuğan telne yaxşı belüçelär, tatar cırların häm iyüllären başqaruçılar bäygeläre ütkärelä, häm ğädättä kiçälär nindi dä bulsa bäyrämgä yäisä tarixi, istälekle datalarğa bağışlana, zamana bäyrämnären dä iğtibarsız qaldırıp bulmıy, yäşlärne kübräk cälep itü öçen,- di Dinara. Aldağı kiçä “Watannı saqlawçılar” könenä bağışlanaçaq. Anda “Xalıqara tuğan tel könen” iskä alaçaqbız,- dilär oyıştıruçılar.

Rozaliä Sayganova, Omski

XS
SM
MD
LG