Accessibility links

шимбә, 3 декабрь 2016, Казан вакыты 07:54

Belarusta saylawlar aldınnan qulğa alular däwam itä


Belarus mäğlümat ministrı Uladzimir Rusakeviç, Daniädä çıqqan Möxämmät päyğämbär räsemnären üzenä küçerep bastıran cirle Zhoda basmasına qarşı çaralar belän yanadı. Atnalıq xosusi Zhoda gazetı karrikaturlarnı 17 fivral könne bastırğan ide. Prokuratura basmanı dinnärara näfrätkä çaqıruda ğäyepläp cinäyät eşe açtı. Zhoda möxarrirläre däwlät iminlek komitetı KGBğa çaqırıldı, iminlek xezmätkärläre eş bülmälären tikşerep 4 komputernı alıp kitte, dip xäbär itelä. Gazeta möxarrire Alyaksandr Sdvizhkov, bu ğämällärneñ säbäbe – säyäsi, häm räsmilär – päyğämbär räsemnären basmanı yabu öçen sıltaw itep qullanaçaq, dide. Zhoda gazetası, prezidentlıqqa namzät Alyaksandr Kazulin citäkçelegendäge Hramada Sosial Demokratik partiäsenä yaqın torğan basma bulıp sanala.

26 fivral yäkşämbe könne Yevropa Berlege aqçalarına açılğan radio häm televidenie kanalı Belarusqa üz tapşıruların başlıy. Berlekneñ tışqı mönäsäbätlär komissionerı Benita Ferrero Waldner, bügen yasağan belderüendä, prezident Alyaksandr Lukaşenka xakimiäteneñ nıq kontrolendä bulğan mäğlümat çaraları, xalıqqa irekle mäğlümat alu mömkinlegen birmi, dide. Anıñ mäğlümat wäkile, tapşırularda nindi dä bulsa propaganda bulunı kire qaqtı.

Belarusnıñ däwlät iminlek komitetı KGB ildä eşläwçe Watandaşlarnıñ İnisiativa Xezmättäşlege dip isemlängän xäkümättän bäysez oyışmanıñ citäkçelären Mikalay Astreyka, Alyaksandr Şalayka, Tsimafey Drançuk häm Enira Branitskayalarnı qulğa aldı. İldä demokratiä üsterergä tırışlıqlar kürgän oyışma, KGB xäbär itüençä, Waşingtondağı demokratik institut tarafınnan finanslanğan bulğan. Belarus xökümäte älege oyışmanı 2 yıl elek tıyğan ide. Xäzer qulğa alınuçılarğa, qanunsız cıyınnar uzdıru häm säyäsi çaralar oyıştıruda ğäyepläw belderelgän. Ägär alar ğäyeple dip tabılsa, monıñ öçen 3tän alıp 5 yılğa qädär törmä yanıy. 2 kön elek qulğa alınğan oyışma wäkilläre xäzerge waqıtta KGBda häm alardan soraw alına, dip xäbär itelä.

XS
SM
MD
LG