Accessibility links

якшәмбе, 4 декабрь 2016, Казан вакыты 09:04

Ğiraq watandaşlar suğışına taba tägärime?


Ğiraqta kürelgän iminlek çaralarına qaramastan, köç qullanular däwam itä. Räsmilär watandaşlar suğışı belän kisätä başladı. Çärşämbedä Samarrada şiği möselmannar öçen izge urın sanalğan törbä şartlatılğannan soñ, törle urınnarda höcümnär yasala. 3 kön eçendä qorbannar sanı 150dän arttı.

Şimbä irtäsendä şiğilärneñ Qarbala qalası bazarında maşinağa quyılğan çirattağı bomba şartladı. "Politsiä xezmätkäre ber maşinanıñ bagajniğın açmaqçı ide, şunda şartlaw yañğıradı", dip iskä ala bu şahit.

Kimendä 4 keşe häläk bulğan, distädän artığı yaralanğan. "Qorbannar kübräk bulası ide, bez yaralanğannarnı şunduq çitkä küçerdek. Min üzem ber cäräxätle balanı xastaxanägä kiterdem, Allağa şöker, alar berniçä genä ide", di xastaxanä xezmätkäre.

Höcümnär Ğiraqnıñ törle urınnarında yasala. İrtä belän Bağdadta qorallı keşelär ber yortqa bärep kerep, 12 keşedän torğan şiği ğailäne atıp kitkän.

Çärşämbe Samarra şartlawında häläk bulğan ber jurnalistnıñ cenazası waqıtında bomba şartlağan, ike keşe häläk bulğan.

Uzğan töndä başqalanıñ sönni mäçete yanında atışular bulğan. İrtä belän bu urında 14 politsiä xezmätkäreneñ casäde tabılğan.

Çärşämbedä Samarrada şiğilärneñ izge urını sanalğan törbä şartlatılğannan söñ höcümnär bermä-ber arttı.

Bağdad hän anıñ tiräsendä köçäytelgän iminlek çaraları kürelä. Komendant säğäte kertelde. Şuña da qaramastan, köç qullanular kimemi. Wazğiät watandaşlar suğışına taba awışa digän borçular äytelä.

Şimbä könne Ğiraqnıñ Saqlanu ministrı Saadun Äl-Dulaimi televidenie aşa turı efirda çığış yasap, xalıqnı tınıçlıqqa öndäde. "Ägär bu ildä watandaşlar suğışı başlansa, ulberqayçan da betmäyäçäk" dip kisätte ul.

Bu öndäwgä amerikan prezidetı George Bush ta quşıldı. Şimbägä qarşı töndä ul "Aldağı könnär qızu bulaçaq. Ğiraqta wazğiät citdi bulıp qala. Läkin min optimist, çönki Ğiraq xalqı üzeneñ süzen äytte, üz niäten belderde", dide.

Köç qullanularnı kimetü niätennän Ğiraq räsmiläre Bağdadta maşina xäräkäten tıydı. Bu tıyu düşämbegä qädär köçendä qalaçaq.

ali ğilmi
XS
SM
MD
LG