Accessibility links

Ğiraqnıñ radikal şiği citäkçese şiğilär belän sönnilärne berdämlekkä çaqırdı


Ğiraqta şiğilär belän sönnilär arasında kierenkelek arta bara. Çärşämbedä Samarrada şiğilärneñ izge urını bulğan törbä şartlatılğannan soñ, sönnilärdän üç alu ğämälläre köçäyde. 4 kön eçendä 20gä yaqın mäçet cimerelde, 200dän artıq keşe üterelde, şularnıñ kübese sönnilär.

İldä watandaşlar suğışı qabınudan qurqıp Ğiraqnıñ dini häm säyäsi citäkçeläre şuşı mäzhäb-ara kierenkelekne kimetü tırışlığın kürä.

Yäkşämbedä şiğilärneñ radikal ruxanie Moqtada Äs-Sadr könyaqtağı Basra qalasında çığış yasap bar möselmannarnı berdämlekkä öndäde. Kiläse comğada, 3 Martta ul alarnı mäçetlärgä kilep, bergäläp ğibädät qılırğa çaqırdı. "Min bar mö''minnärne, sönnilärne dä, şiğilärne dä, Möxämmät päyğämbärçä, tuğan bulırğa öndim", di Moqtada Äs-Sadr.

Ruxani ğibätät yortların sönni häm şiği mäçetlärgä ayırmasqa çaqırdı. "Min sönnilär belän şiğilärne bergäläp ğibädät qılırğa çaqıram, şul isäptän zıyan kürgän mäçetlärdä dä, kürmägännärendä dä. Sönni yä şiği mäçet digän närsä yuq", di Moqtada Äs-Sadr.

Bu çığıştan soñ küp waqıt ta uzmadı, Basra şähäreneñ ikençe başındağı ber Şiği mäçettä şartlaw yañğıradı. Politsiä äytüenä qarağanda, bomba quyarğa mataşqan 3 ir keşe yaralanğan.

Monnan tış bügen Hilla qalasında bulğan şartlawda 7 keşe häläk bulğan. Bağdadtan könyaqqa taba mäzhäblär uqmaşıp yäşägän bu täbäktä sönni ğisyançılar xäräkät itä.

Ul arada başqalada köçäytelgän iminlek çaraları kürelä. Maşina xäräkäte tıyılğannan soñ Bağdad uramnarı bügen çağıştırmaça tınıç. Ğiraq politsiäse leitenantı Mäxmüt Mortadha äytüençä, ğadi xalıq räsmilärgä şaqtıy yärdäm kürsätä. "Xalıqnıñ yärdäme iskitkeç. Komendant säğäten alar ğämälgä quya. Bez barı tik aşığıç oçraqlarda, bik nıq kiräk bulğannarğa ğına uzırğa yärdäm itäbez", di ul.

Şimbä könne Ğiraqnıñ Saqlanu ministrı Saadun Äl-Dulaimi, Ğiraqta watandaşlar suğışı qabınsa, anıñ oçı-qırıyı bulmayaçaq, dip kisätte. Ğiraqnıñ yuğarı räsmiläre, şul isäptän, premier-ministr İbrahim Cäğfäri, prezident Calal Talabani qatnaşında, ildäge wazğiätne yaxşırtuğa bağışlanğan oçraşu ütte.

ali ğilmi
XS
SM
MD
LG