Accessibility links

чәршәмбе, 7 декабрь 2016, Казан вакыты 23:14

Yewropa Berlege Serbiägä suğış cinayätlärendä şiklänelüçelärne totu öçen ber ay waqıt birde


Yewropa Berlege Serbiäne, suğış cinäyätlärendä ğäyeplängän Radko Mladiç belän Radovan Karadjiçnı totuda yärdäm itergä çaqırdı, yuq isä, anıñ belän Berlekkä kerü söyläşülären tuqtatıp toru belän kisätte. Düşämbedä Brusseldä ütkän oçraşuda Belgradnıñ xalıqara tribunal belän citärlek xezmättäşlek itmäwe turında äytelde, häm qaçqınnarnı totu öçen ber ay waqıt birelde.

Yewropa Berlege tışqı eşlär ministrlarınıñ düşämbedä Brusseldä ütkän oçraşuında ike fiker köräşte diärgä bula. Beryaqtan, ministrlar Belgradnı, suğış cinäyätlärendä ğäyeplängän Radko Mladiç belän Radovan Karadjiçnı totu öçen citärlek köç quymawda ğäyepläde, häm anıñ belän äğzalıq söyläşülären tuqtatıp torırğa çaqırdı. Şul uq waqıtta, qayber ministrlar, bezgä Serbiäne yuğaltırğa yaramıy, dip çığış yasadı. Näticädä, Belgradqa qılanışın üzgärtü öçen ber ay waqıt birelde.

Döresen äytkändä, mondıy qarar bulasın oçraşuğa qädär ük farazlap bula ide. Yewropa Berlegeneñ tışqı säyäsät başlığı Javier Solana, utırış başlanğançı uq jurnalistlarğa "Bez Serbiä-Montenegronıñ xalıqara tribunal belän xezmättäşlege tulı külämdä buluın telibez. Ägär ul alay tügel ikän, bez söyläşülärne tuqtatıp tora alabız. Läkin alarnıñ äle waqıtı bar. Kiläse söyläşülär April başında kötelä", dide.

Oçraşu näticäsendä ministrlar Serbiäne, häm dä Bosniä-Herzegovinanı, Mladiç belän Karadjiçnı mömkin qädär tirzäk qulğa alırğa çaqırğan qarar qabul itte.

Diplomatlarnıñ berse bezneñ Brusseldäge xäbärçegä äytüençä, Berlekneñ kiñäyü öçen cawaplı räsmie Olli Rehn, älegä çaralar kürmägän, läkin, ägär Belgrad ber ay eçendä xalıqara tribunal belän tulı xezmättäşlek kürsätmäsä, 4 Aprilgä bilgelängän söyläşülär ütmiäçäk, dip kisätkän.

Yewropa Berlegeneñ Serbiä belän söyläşüläre uzğan yılnıñ Üktäberendä başlandı, häm ber yıl çaması barır dip kötelä. Bu söyläşülär Balkan illäreneñ Berlekkä kerü yulında mäcbüri adım bulıp tora.

Brusseldäge tağın ber çığanaq bezneñ xäbärçegä äytüençä, xalıqara tribunalnıñ baş prokurorı Carla del Ponte, Serbiä tribunal belän xezmätäşlek itmi dip, Yewropa Berlegen aña basım yasarğa çaqırğan. Ämmä moña qädär äğza illärneñ kübese - häm dä Yewrokomissiä - närsä eşlärgä kirägen Berlek üze dä yaxşı belä digän, fikerdä tordı.

Serbiä belän qarşılıqqa kermäskä çaqırğan illärneñ berse – Germaniä. Düşämbedä Germaniä tışqı eşlär ministrı Frank-Walter Steinmeier Yewropa Berlege Serbiäne yuğalta almıy dip belderde. Şuşı atnada ul Belgradqa barırğa cıyına. "Atnakiç könne min Serbiägä baram. Beryaqtan, bezneñ Serbiä belän söyläşergä äzerlegebez belän, ikençe yaqtan, Serbiäneñ xalıqara tribunal belän xezmättäşlek itü teläge arasında bäyläneş buluğa, älbättä basım yasayaçaqmın", dide ul.

Ä menä Britaniä belän Niderland kebek illär, bu mäsälädä qırısraq qaraşta tora. Xalıqara tribunal belän xezmättäşlek itmägän Balkan illäre belän alar gel şulay eşläde. Äytik, Ante Gotovina totılğançığa qädär, Xorvatiä belän söyläşülärgä qarşı çığıp kildelär. Xäzer dä, Britaniä belän Niderlandnıñ tışqı eşlär ministrları şul uq fikerne äytälär: Serbiä xalıqara tribunal belän tulı xezmättäşlek kürsätsen, qaçqınnarnı totuda yärdäm itsen, yuq isä Yewropa Berlegeneñ tulı xezmättäşlegenä ömet itmäsen.

Ali Gilmi
XS
SM
MD
LG