Accessibility links

чәршәмбе, 7 декабрь 2016, Казан вакыты 15:30

Qarabolaqta tuğan tel bäyräme


Küptän tügel Yekaterinburg şähärendä eşläp kilüçe Milli media-xolding häm Mäcit Ğafuri isemendäge tatar-başqort mädäni oyışması citäkçeläre ber törkem tatar cırçıları belän berlektä Çiläbe ölkäseneñ Qarabolaq awılına icat säfärenä barıp qayttılar. Älege säfärneñ töp maqsatı bulıp geografik yaqtan Çiläbe häm Yekaterinburg şähärläre arasında urnaşqan bu tatar awılında yäşäwçe millättäşlärebezgä yärdäm itü tordı.

Uzğan yılnıñ oktäber ayında bu awılda yazuçı Fäwziä Bäyrämovanıñ “Atom atawında yäki tatarlarğa qarşı atom genotsidı” dip atalğan kitabın täqdir itü bulıp uzğan ide. Oçraşu kiçäsenä kilüçelär ul waqıtta awıl xalqınıñ närsägä moxtaclığın da kürep kitkännär. Mäcit Ğafuri isemendäge tatar-başqort mädäni üzäge räise Söfxät ağa Nadıyrov söyläwençä, biredä inde küptän tatar tele däreslekläre, metodik äsbaplar, uqıtu programmaları yañartılmıy, ädäbi kitaplar bötenläy yuq, uqıtu klassları buş, kürgäzmä äsbaplar da yuq ikän. Şuña kürä ul waqıtta bu mäktäpkä quldan kilgänçä yärdäm itärgä qarar itelgän.

Awıl mäktäbeneñ sport zalına ul könne xalıq bik küp bulıp cıyıldı. Kiçädä Musa Cälil, Gabdulla Tuqay kebek oluğ şäxeslärebezneñ yubiley yılına bağışlap küp çığışlar yasaldı. 21нче fevral'dä bilgeläp ütelgän xalıqara tuğan tel köne uñayı belän, tatar telebezgä dan cırlandı. Söfxät ağa Nadıyrov mäktäp direktorına Qazannan alıp qaytqan uqu äsbapların, däresleklär tapşırdı.

Yekaterinburg qunaqları Qarabolaqqa bik matur muzıkal küçtänäç tä alıp kilgännär ide. Zalğa cıyıluçılar Tatarstannıñ atqazanğan artistı Xäydär Gıyyl'fanov, Ural töbägeneñ tanılğan cırçıları İl'dam Şäripov, Zölfiä Möbäräkşina başqaruındağı cırlarnı, Ural däwlät konservatoriäse studentı Dilizä Nadıyrovanıñ dumbrada tatar köylären başqaruın, bayançı Färit Äxmätov çığışın köçle alqışlar belän qarşı aldılar. Xalıq räxmäte çiksez buldı.

Kiçä bar xalıqnıñ da ayağürä basıp Gabdulla Tuqay süzlärenä yazılğan “Tuğan tel” cırın başqaru belän tämamlandı. Bu oçraşu çın mäğnäsendä tuğan tel bäyrämenä äwerelde.

Fäwiä Safiullina, Yekaterinburg

XS
SM
MD
LG