Accessibility links

Кайнар хәбәр

Ninel Yultıeva yubileyın bilgeläp ütte


2006 yıl törle yubiley, istälekle datalarğa bik bay. Alarğa bağışlanğan tantanalı çaralar, kiçälär dä bik yış uza bıyıl Qazanda. Şularnıñ berse sişämbe kiçendä Musa Cälil isemendäge opera häm balet teatrında ütte. Qışnıñ soñğı könendä anda tanılğan biüçe, Qazannıñ xoreografiä usçilesçası möğallime Ninel’ Yultıevanı qotladılar. Bıyıl üzeneñ 80 yäşlek yubileyın bilgeläp ütkän biüçe 1926 yılnıñ 3 fevralendä, Ufada, tanılğan başqort şağire Dawıt Yultıy ğailäsendä tua. Üzeneñ icat yulın ul suğış yıllarında Başqort opera häm balet teatrında başlap cibärä. 1946 yıldan isä Ninel’ xanımnıñ yazmışı Tatarstan, Qazan belän bäyle. Tatar opera häm balet teatrı säxnäsendä Yultıeva iñ zur rol’lärne başqarıp, tamaşaçılar küñelenä kerep qala. Ul Aqqoş küle, Don Kixot, Jizel’, Şüräle häm başqa bik küp spektakl’lärdä bii. Tatarstanda professional’ balet, xoreografiäneñ üseşe dä näq menä Ninel’ Yultıevanıñ iseme belän bäyle. Opera häm balet teatrında ul berniçä balet quya. Misırda Kahiräneñ balet truppasında, Venesuella biü teatrlarında da eşli. Üzeneñ ostalığın tanılğan biüçe yäşlärgä dä öyrätergä omtıla. Biüçe karyerasın tämamlağaç ul Qazan däwlät mädäniät institutında belem birä. Soñraq Qazan xoreografiä usçilesçasın açuğa zur tırışlıq quya häm bügenge köndä dä anda balalarğa biü serlären açunı däwam itä.

Ninel’ xanımnıñ tuğan köne inde 3 fevral’ könne ük bulsa da, yubiley uñayınnan bäyräm çarası barı tik ay azağında ğına uzdı. Kiçädä Tatarstannıñ Mädäniät ministrı Zilä Wälieva yubilyarğa respublikanıñ Danlı xezmät öçen digän medalen tapşırdı. Rusiä, Tatarstan häm Başqortstannıñ xalıq artistı, professor Ninel’ Yultıevanı qotlarğa respublikanıñ Mädäniät ministrlığınnan ğına tügel, Başqortstan citäkçelege wäkilläre dä kilgän ide. Başqortstannıñ Mädäniät häm milli säyäsät ministrı urınbasarı İrina Mäxmutova Mortaza Räximovnıñ qotlawların citkerde häm Ninel’ Yultıevanıñ icadi yulı Ufada başlanuı belän ğorurlanuları xaqında söyläde. Räsmi zatlardan tış yubilyarnı kollegaları da qotladı. Opera häm balet teatrı, Qazan däwlät konservatoriäse, Ğäliäskär Kamal isemendäge tatar teatrı, Däwlät cır häm biü ansamble, Mädäniät häm sänğät akademiäse, Qazan biü ansamble wäkilläre Ninel’ Yultıevağa üzläreneñ qotlawların häm büläklären citkerde. Başqortstannan biüçeneñ säxnädäge berençe partnerı - Xaşim Mostaev ta kilgän ide. Ostazların Qazan xoreografiä usçilesçası uquçıları da sälämläde. Alar Ninel’ xanımnı qotlap, matur teläklär citkerüdän tış, üzläreneñ ostalıqların da kürsätte. Uquçılar Yultıeva quyğan Söyembikä häm Şüräle adajiosın, Tarantella, Venesuella biüen başqardılar, başqa äsärlärne täqdim ittelär. Kiçäneñ ikençe bülege tanılğan biüçeneñ uquçıları çığışınnan tordı. Kiçädä Ninel’ Yultıevanıñ isemen Qazannıñ berär uramına, ä iñ äybäte Qazan xoreografiä usçilesçasına birergä digän täqdim dä yasaldı. Menä şundıy qızıqlı kiçägä cıydı 80 yäşlege uñayınnan Ninel’ Yultıeva üzeneñ icatın söyüçelärne qışnıñ soñğı könendä.

Gölnaz İlgizär

XS
SM
MD
LG