Accessibility links

якшәмбе, 11 декабрь 2016, Казан вакыты 10:58

Ğiraqta mäzhäbara höcümnär däwam itä


Ğiraqnıñ Samarra şähärendä şığıylar törbäse şartlatıluğa 1 atna tuldı. Şul höcümnän soñ sönnilär belän şığıylar arasında başlanıp kitkän köç qullanu näticäsendä 400-läp keşeneñ ğömere özelde. Dini häm säyäsi citäkçelär xalıqnı tınıçlanırğa öndi häm soñğı könnärdä köç qullanu kimi başladı. Ämma soñğı bomba höcümnäre äle tınıçlıq tiz genä urnaşmayaçağın kürsätä.

Çärşämbe könne Bağdadnıñ törle urınnarında bulğan 3 şartlaw tağın 30 keşeneñ ğömeren özde. Başqalanıñ şığıy öleşendä maşinağa quyılğan bomba 14 keşene üterde. Başqa ber urında maşina astına quyılğan bomba politsiä kizüe ütep barğanda şartlatılıp 3 sivilne üterde.

Bu höcümnär şığılarnıñ Samarradağı möhim törbäse şartlatılğannan soñ qabınıp kitkän mäzhäbara kierenkelekneñ betergä aşıqmawın kürsätä. Ber atna elek bulğan şul şartlawdan soñ ğiraqta üzara üç alular, mäçetlärgä höcümnär başlandı, şığıy häm sönni suğışçılar uramnarğa çıqtı.

Sişämbe könne genä dä başqalada 60-lap keşe üterelde. Ber şartlaw Bağdad üzägendäge Karrada rayonında xalıq küp cıyılğan zur uramda buldı. Şul xälne kürgän Xäydär Möxämmät Rueters agentlığına bolay dip söyläde.

"Sängär Daewoo maşinalı beräw Bağdad äl-Cädidädä cıyılğan eşçelär yanına kilep tuqtadı. Ul beraz eş bar, eşçelär kiräk dide. Şunnan soñ qulın kesäsenä tıqqaç zur şartlaw häm qatı yanğın çıqtı" dide Xäydär.

Başqalanıñ Yaña Bağdad dip atalğan bu rayonınıñ başqa urınında benzin stansiäsendäge şartlaw tağın berniçä keşene üterde. Ul şartlawnı kürgän Firas Xäsän İlliwi Reutersqa anı intixarçı şartlatqan dip isäpläwen belderde. Ämma anıñ äytkännäre äle başqa çığanaqlardan raslanmadı.

"Şartlatqıçlı bilbaw kigän, yäki şartlatqıçın kanistrağa yäşergän beräw şartlatıp keşelärne üterde. Ägär dä xökümät berni eşli almıy ikän çigenergä tieş. Citärlek qazap çiktek. Qul monda ayaq tegendä. Nigä bez bolay ğazaplanabız. Şığıylar bulğan öçenme. Bezneñ cinayätebez şığıy buluda" dide İlliwi.

Sişämbedäge şartlawlarnıñ berse Säddam Xösäin ğailäse belän bäyle ber urında buldı. Şartlaw näticäsendä Tikritta Säddamnıñ atası qäbärendä tözelgän keçkenä mäçetkä zıyan kilsä dä, yaralanuçılar bulmadı. Bu mäçetkä höcüm Ğiraq cämğiätendä mäzhäbara büleşneñ tağın ber çağılışı buldı. Küp kenä küzätüçelär büleneş Säddam Xösäin çorında köçäyde di.

Säddam üz xakimiäten azçılıqnı täşkil itüçe sönnilärgä nigezläp küpçelektäge şığıylarnı ezärlekläp kilde. Bügen şığıylar anı kürä almıy, qayber sönni suğışçılar isä anı qaharman dip sanıy. Alar Ğiraqta demokratiä sönnilärneñ köçen kimetäçäk di.

Bu 3 yıl çaması elek Ğiraqqa AQŞ köçläre kergännän birle iñ köçle mäzhäbara büleneş häm Waşington moña zur krizis dip qarıy.

Sişämbe könne AQŞ prezidentı George Bush tınıçlıqqa öndärgä çaqırıp Ğiraqtağı berniçä çitäkçegä şaltıratuın bılderde. 2851

"Uzğan atna axırında min Ğiraqtağı 7 citäkçe belän söyläştem. Alar xälneñ ni qädär yaman buluın añlıy. Alar berdäm xökümät tözü öçen eşlärgä buldı" dide Bush.

Çärşämbe könne Ğiraq premyer ministrı İbrahim äl-Cäğfäri tağın ber märtäbä dikäberdä ütkän parlament saylawları näticäsendä berdäm xökümät tözü söyläşülären däwam itärgä wäğdä birde. Cäğfäri bez taraflar arasındağı söyläşülärne däwam itäçäkbez. Xökümät tizdän tözeläçäk. Ul xökümät kiñ nigezle bulaçaq dide.

Naif Aqmal, Praga.
XS
SM
MD
LG