Accessibility links

Кайнар хәбәр

Belarusta meñnärçä oppozitsiä tarafdarı mitingqa çıqtı


Pänceşämbe könne Belarus başqalası Minskida meñnärçä oppozitsiä tarafdarı mitingqa çıqtı. Uramda politsiä xezmätkärläre dä küp ide. Ämma bäreleşlär turında xäbärlär bulmadı. Röxsätsez bu miting prezident saylawlarına 3 atna qalıp barğanda, kierenkelek arta barğan şartlarda ütte. AQŞ, Yewropa berlege häm Yewropada İminlek wä xezmättäşlek oyışması saylaw aldı atmosferasınıñ naçarayuına borçılu belderde. Prezident Aleksandr Lukaşenko isä Könbatıştnı Belarusnıñ eçke eşlärenä tıqşınmasqa dip kisätte

19 martta ütäçäk prezident saylawlarında Lukaşenkonıñ töp köndäşe, oppozitsiä citäkçese Aleksandr Milinkeviçnı yaqlawçı 3 meñläp keşe pänceşämbe könne Minskida saylaw aldı mitingına çıqtı. Mitin tınıç yul belän taratılğançı Milinkeviç çığış yasap ölgerde.

"Qäderle duslar, min sezne qotlıym. Belarusqa irek, ğädellek häm döreslek kilä. Bezneñ keşelärçä yäşäw, Yewropada yäşäw, irekle il bulu xoquqıbız bulaçaq. Yäşäsen Belarus!" dide Milinkeviç.

Aldan planlaştırılğan bulsa da xakimiätlär tarafınnan provokatsiä dip bäyälängän miting urınına ber meñläp politsiä xezmätkäre kiterelde.

3-nçe möddätkä saylanırğa teläwçe prezident Lukaşenko comğa könge çığışında provokatsiälärgä uyaw qararğa çaqırdı.

"Bu saylaw kampaniäse bezneñ qorallı köçlärgä, iminlek köçlärenä bik qimmätkä töşä, bik küp nervanı häm sälamätlekne ala. Kierenkelek şul qädär köçle ki, sez xätta küz aldına da kiterä almıysız. Ämma min xökümät räsmilärenä ber maqsat quydım. Bernindi provokatsiälärgä bireşmäskä. 19-nçı martqa qädär tınıç qına yäşärgä, ä ul könne xalıq qarar itär" dide Lukaşenko.

Elegräk Lukaşenko Gruziä, Ukraina häm Qırğızstanda bulğan tösle inqilablarğa Belarusta irek quymıyaçağın äykän ide. Lukaşenko pänceşämbe könne parlamenttağı çığışında üz säyäsäteneñ xalıq tarafınnan yaqlanuın belderde.

"Belarus xalqı üz täcribäse nigezendä inqilablar artında, nindi genä töstäge inqilab bulmasın, barı tik qara köçlär genä buluın añladı. Şuña kürä ul ezlekle üzgäreşlär häm nıqlı sotsial garantiälär säyäsäten xupladı" dide Lukaşenko.

AQŞ isä Belarusta xökümättän bäysez oyışmalarğa, oppozision säyäsmännärgä häm sivil cämğiät oyışmalarına qarata qurqıtu atmosferası köçäyä baruğa borçılu belderde. AQŞ süzşese Bruce Connuck Belarus xakimiätlären repressiälärne aqlaw öçen astırtın eşlär, krisislar oyıştıruda ğäyepläde.

Warşawda Yewropada İminlek wä xezmättäşlek oyışmasınıñ Demokratik Oyışmalar häm Keşe Xoquqları idaräse Belarusta saylaw aldı atmosferası nıq naçaraya dip belderde.

Brüssel''dä Yewropa Komissiäse süzçese Krisztina Nagy Belarus xakimiätlären saylaw aldı köräşendä barlıq namzätlärgä dä tigez şartlar buldırırğa çaqırdı.

"Ägär dä saylawlar demokratik şartlarda ütmäsä bez cawaplı keşelär öçen ayırım çikläwlär kertergä äzer" dide Nagy.

Pänceşämbe könne oppozitsion Sotsial Demokratlar partiäse citäkçese, prezidenlıqqa namzät Aleksandr Kazulin Lukaşenko çığış yasağan urınğa kergändä berniçä säğätkä totqarlandı. İminlek xezmätkärläre anı qıynağan dip xäbär itelde.

Naif Aqmal, Praga.
XS
SM
MD
LG