Başqortstan räsmi xakimiätläre Rusiägä quşılunıñ 450 yıllıq yubileyına äzerlekne kiñ mäydanda alıp bara başladı. Bu eşkä iñ berençe çiratta xökümät qaramağındağı gazetalar häm radio-televidenie cälep itelä. Rusiägä quşılunıñ niqädär aqıllı adım bulğanlığın bar xalıqqa añlatu öçen, kiñ cämäğätçelek arasında zur añlatu eşläre alıp baru kiräk, dip isäpli respublika türäläre. Ni öçen digändä, küp xalıq Başqortstannıñ 450 yıl elek Rusiägä quşıluı mäğnäsen añlap ta betmi ikän. Monı Başqortstan Prezidentı xakimiäteneñ İctimaği-säyäsi üseşe bülege mödire Ämir Yuldaşbaev jurnalistlar belän oçraşuında äytte. “Mäskäwlär üzläre dä, Rusiä xalqı da, xätta kürşe Tatarstan da Başqortstannıñ Rusiägä quşıluı kebek tarixi waqiğanı añlamıy”, - dip belderde Yuldaşbaev äfände.
Başqortstan Prezidentı xakimiäteneñ İctimaği-säyäsi üseş bülege mödire Ämir Yuldaşbaev fikerläre buldı bu. Alarnı ul atnakiç könne jurnalistlar belän oçraşuında yañğırattı. Şulay itep, Başqortstan xakimiätläre kiläse yılnıñ cäyendä bulaçaq yubileynıñ ideologik, propagandistik yağına da zur iğtibar birergä isäpli. “Vladimir Putinnıñ fatıyxası belän federal'' külämdä ütkäreläçäk bu bäyrämneñ eçtälegen başqortstanlılar ğına tügel, ä bar Räsäy xalqı belergä tieş”, - dip belderä Başqortstan citäkçeläre häm bu eşkä matbuğat çaraların kiñ cälep itärgä niätli.
