Accessibility links

якшәмбе, 4 декабрь 2016, Казан вакыты 01:05

Ufada 4 mart könne qarşılıq çaraları ütä


Elekke programmalarıbızda da xäbär itelüençä, bu şimbädä, 4 mart könne Ufada kiñ qolaçlı qarşılıq çaraları ütäçäk. Başqortstannıñ berläşkän oppozitsiäsenä kerüçe bik küp oyışmalar qatnaşlığında oyıştırıluçı bu uram cıyınnarına, nihayät, röxsät alındı. Respublika xakimiätlärenä bu mitingnı uzdıruğa röxsät sorap yazılğan möräcäğät bik ozaq qaraldı. Şuña da soñğı köngä qädär diärlek bu uram cıyınınıñ ütü-ütmäwe soraw astında ide. Comğa könne oppozitsiägä kerüçe oyışmalar citäkçeläre üzläreneñ çirattağı utırışına cıyılıp, anda älege qarşılıq çaralarına soñğı äzerleklärne tikşerde. Anda süz, nigezdä, bıyıl berençe tapqır oyıştırıluçı uram cıyının oyışqan töstä ütkärü, ixtimal bulğan provokatsiälärgä bireşmäw, sabır häm berdäm bulu xaqında bardı.

Şulay itep, Ufanıñ härdaim zur-zur cıyınnar ütkärelä torğan Lenin isemendäge iñ üzäk mäydanında Başqortstandağı bıyılğı berençe kiñ qolaçlı uram cıyını, qarşılıq çarası oyıştırıla. Anda Başqortstan oppozitsiäse eçenä kerüçe bik küp oyışmalar häm partiälär – “Rus''” ictimaği oyışması, Kommunistlar firqäseneñ Başqortstan bülege, Tatar ictimaği oyışmaları berlege, Pensionerlar firqäse, ğomumän alğanda cämğısı utızğa yaqın oyışma äğzaları qatnaşaçaq. Aldan uq iğlan itelüençä, uram cıyınında, nigezdä, sotsial'' problemalar kütäreläçäk. Ämma säyäsi şiğar''lär dä bulaçağı mäğlüm. Monı oppozitsiä wäkilläre dä üzläre dä xäbär itä kilde. Şulay uq monı başqaladağı küp kenä yortlarğa, oyışmalarğa taratılğan mitingqa çaqıru käğäzlärendä dä uqırğa mömkin.

Başqortstan Berläşkän oppozitsiäse kileşterü şurası räise Ramil Bignov süzlärençä, sotsial'' mäs''älälär turıdan-turı xakimiätlär ütkärgän säyäsätkä bäyle. “Şuña da respublika xakimiätläreneñ eşçänlegenä rizasızlıq belderüläre, törle möräcäğätlär, qararlar qabul itü dä küz uñında totıla, - di Ramil äfände. - Häm, ğomumän, Başqortstanda grajdannarnıñ azatlığın häm säyäsi xoquqların yaqlaw çığışları da bulaçaq”.

Şimbä könne älege qarşılıq çaraları belän ber ük waqıtta häm şul uq Lenin mäydanında Başqortstan tatar milli oyışmaları wäkilläre dä üzläreneñ uram cıyının ütkärä. “Anıñ öçen röxsät Ufa tatar milli-mädäni moxtariäte isemennän genä alınğan bulsa da, bu cıyında respublikadağı tatar milli xäräkätenä kerüçe başqa oyışmalar da qatnaşaçaq, - di tatar xäräkäte citäkçeläreneñ berse, professor Mäcit Xucin. – Taläplär elekkeçä qala – Başqortstanda tatar telenä dä däwlät statusı birü kiräklege, respublikada tatar balalarınıñ tatarça belem alırğa xoquqın saqlaw, tatar mädäniätenä kübräk mömkinleklär birü häm başqalar häm başqalar.

Başqortstannıñ Berläşkän oppozitsiäse citäkçeläre 4 martta ütäçäk uram cıyını waqıtında respublika xakimiätlären yaqlawçı başqort milli oyışmalarınıñ, ayıruça Başqort yäşläre berlege yoğıntısındağı başqort yäşläreneñ törle provokatsiälär oyıştırırğa mataşu ixtimallığın da äytte. Andıy şartlarda sabır bulırğa kiräklege comğa ütkän utırışta tağın ber qat assızıqlandı.

XS
SM
MD
LG