Accessibility links

Кайнар хәбәр

Kürenekle ğalim Ütäbay-Kärimi iskä alındı


Başqortstanda yäşäp fänni eşçänlek alıp barğan tanılğan tatar ğalime, islamiät häm şäriğät belgeçe Rawil Ütäbay-Kärimineñ wafatına tögäl ber yıl tuldı. Şuşı uñaydan 4 mart könne Ufada anı iskä alu – Xäter kiçäse bula.

Rawil Ütäbay-Kärimi üze Tatarstannıñ Teläçe rayonında tuıp üsep, Qazanda uqısa da, ğömereneñ zur öleşe Ufa belän bäyle. Biredä ul kiñqırlı ğilmi eşçänlek alıp bara. İslam dinen, şärıq dönyasın öyränü tıyılğan citmeşençe-siksänençe yıllarda da islam dine tarixın, kürenekle möftilärneñ eşçänlegen öyränep bik küp mäqälälär yaza. Barlıq törki tellärne, şul isäptän törek telen dä su urınına eçkän, ğäräp, alman tellären yaxşı belgän ğalimne “ayaqlı ensiklopediä” häm “tatar Äbuğalisinası” dip yörtälär. Rawil ağanıñ Törkiädä, Urta Aziä respublikalarında tığız aralaşqan, xezmättäşlek itkän ğalimnäre küp ide. Amerika Quşma Ştatlarında yäşäwçe kürenekle tatar ğalimäse Ayşä Rorlix belän dä tığız fänni xezmättäşlektä tordı Rawil Ütäbay-Kärimi. Yäş ğalimnärgä dä yärdäme küp tide ataqlı ğalimneñ. Tumışı belän Başqortstannıñ Stärlebaş rayonınnan bulğan tarixçı ğalim Marsel' Farxşatov şularnıñ berse. Marsel' äfände bügenge köndä Almaniäneñ Bonn şähäre universitetınıñ Şärıq institutında eşli. Äle Ufağa Rawil Ütäbay-Kärimineñ Xäter kiçäsenä qaytqan ul. Üzeneñ ostazı xaqında menä niçek iskä ala Marsel' äfände.

Almaniäneñ Bonn universitetı Şärıq institutında eşläwçe tatar ğalime Marsel' Farxşatovnıñ ataqlı ğalim Rawil Ütäbay-Kärimi xaqında istäleklären işettegez. Ul Ufada ber yıl elek wafat bulğan tanılğan tatar ğalime Rawil Ütäbay-Kärimine iskä alu- Xäter kiçäsenä qaytqan. Xäter kiçäse şimbä könne Ufadağı “İxlas” mäçeteneñ 250 keşelek tamaşa zalında ütäçäk. Anda kürenekle ğalimnär, ruxanilar, yazuçılar, uqıtuçılar, Rawil Ütäbay-Kärimine yaxşı belgän keşelär qatnaşa.

Fänis Fätxi, Ufa

XS
SM
MD
LG