Accessibility links

George Bush Könyaq Aziä säfären Paqstanda däwam itä


Paqstan prezidentı Pärwäz Möşärräf Bushnı xärbi tantana belän qarşı aldı. Soñraq alar ikäwdän ikäw genä söyläşülär ütkärgännän soñ urtaq matbuğat oçraşuında çığış yasadı. Bush Amerika belän Paqstan arasındağı kiñ häm ozın strategik xezmättäşlekne xuplap çığış yasadı.

"Äl-Qaidäne beterü öçen küp eş başqarası bar. Prezident Möşärräf häm min monı beläbez. Bügenge irtäne bez başqarası eşlär turında söyläşep ütkärdek. Äl-Qaidäne ciñü öçen iñ yaxşı yul küzläw mäğlümätlären büleşü, alarnıñ qayda buluın açıqlaw häm alarnı xökemgä tartuğa äzerlänü" dide Bush.

Möşärräf isä üz çığışında Bush belän söyläşülär AQŞ belän strategik mönäsäbätlärne canlandırdı häm bälki köçäytep cibärde dide. Ul şulay uq Paqstannıñ suğışçılarğa qarşı köräştäge citeşsezleklären dä telgä aldı.

"Qayber citeşsezleklär bulsa da alar tormışqa aşıru belän bäyle. Ämma maqsatlar açıq, niät häm strategiä açıq. Bez alğa barabız häm bez uñışqa ireşäçäkbez" dide Möşärräf.

Paqstan belän Hindstan arasında uzğan ğasırda 2 suğışqa kitergän Kaşmir nizağına tuqtalıp Bush iñ yaxşı çişeleş yulı monı ike ilneñ citäkçeläre arasında xäl itü bulaçaq dide.

Bush şulay uq 7 yıl elek tüntäreleş näticäsendä xakimiätkä kilgän Möşärräf citäkçelegendäge Paqstanda demokratik reformalar zarurlığı turında süz kütärde.

Bush Paqstannıñ töp köndäşe Hindstanda bulğanda Dähli belän atom xezmättäşlege turında kileşü iğlan itkän ide. Paqstanğa ul mondıy xezmättäşlek täqdim itüen beldermäde.

Şul uq waqıtta Bush Paqstannıñ İrannan tabiği gaz aluına qarşı bulmawı turında äytte. Elegräk Waşington bu mäs''älägä alay tınıç qaramıy ide.

"Prezident minem belän söyläşüdä bu mäs''äläne kütärde. Paqstannıñ üsä baruçı iqtisadı öçen energiä ixtiaçın, ildä tabiği gaz belän bäyle xälne añlatıp birde. Bez töbäktä tabiği gaz ixtıyaçın añlıybız" dide Bush.

Paqstan bu atnada Äfğänstan belän Hindstanda bulğan Bushnıñ Könyaq Aziä säfärendäge soñğı tuqtalış. Anda Bush säfärenä qarşı mitinglar ütte. Bush säfäre barışında iminlek çaraları arttırıldı.

Naif Aqmal, Praga.
XS
SM
MD
LG