Accessibility links

җомга, 9 декабрь 2016, Казан вакыты 03:01

Samar xalqınıñ 94%-ı toraq bäyäsen tüläp bara


Toraq- kommunal xucalığı kürsätkän xezmät könnän- kön qimmätlänä bara, ä xalıqnıñ tüläw mömkinçelege bik tübän. Ğalimnär bilgelägän sannar iğtibarğa layıq. Ğailädä ayına keşe başına 500 dollar kerem bulğanda, ğailä urta xälle sanala ikän. Ä bu san Rusiä xalqın ikegä genä bülä: xäyerçelär häm baylar.

Samar matbuğatında fatir xaqın tüläw turında bulğan zur söyläşüne bastırdılar. “Kommunal toraq xucalığı revolyutsiälärgä tüzmi” iseme astında çıqqan materiallardan ayırım fikerlär tübändäge.

Bügenge köndä samaralılar fatir xaqın 100% külämdä tülilär. Elgärege dotatsiälär beterelde. Toraq qimmät dielsä dä, aqçanıñ tik 22% çaması ğına çın toraqqa kitä, bu çığımnar- remont, çüp- çarnı çığaru, cıyıştıru, lift xezmäten kürsätü. Ä menä qalğan aqçanıñ zur öleşe gazğa, energetikağa, suğa küçerelä.

Samarda toraq mäs’äläsen xäl itü yözennän 5 qatlı xruşçevkalarnı xäzer tuğız qatlığa äyländerälär. Häm äytergä kiräk şundıy üzgärtü qazna aqçasına bik qimmätkä töşä, ber yortnı üzgärter öçen 14 mln sum aqça kiräk.

Bıyıl Samarda 12 xruşçevkanı tuğız qatlığa äyländerü öçen byudjetta 166 mln sum aqça qaralğan. Samaralılar bu täcribäne Germaniädän alğannar. İke Germaniäne quşqaç, kapitalizmlı Könbatış Germaniä sotsializmnan küçkän Germaniägä üz aqçasına şul ısul belän öylärne zuraytqan.

Bügen yortlar äkrenläp şäxsi firmalarğa tapşırıla. Toraq- kommunal xucalığı citäkçese Vladimir Vasilenko äytüençä, sälämätlängän yortlarnı şäxsi firmalarğa kapital remont yasap tapşırırğa kiräk, bu eşne başlap cibärer öçen, şähär byudjetında 2 mlrd sum aqça bulırğa kiräk ikän häm Vasilenko, äfände mondıy aqça tik Mäskäw şähäre qaznasında ğına bar di.

Vasilenqo fikerençä, toraq- kommunal xucalığın şäxsi kompaniälärgä birgändä, kontrol'ne köçäytergä kiräk, bezneñ şartlarda yalğançılar küp. Bügen Samarda 24 toraq yortqa şäxsi kompaniälär aqça alıp qaçqannar, bolar aldanğan 2 meñ keşe digän süz. Toraq- kommunal xucalığın kontrol'sez qaldırsaq, bu san unar meñlägän bulaçaq,- di Vasilenqo.

Samarda bügenge köndä gazğa, utqa ayırım tülänä, tizdän suğa, cılıtu öçen ayırım- ayırım tüläw oyıştıraçaqlar. Bu inde aqçanıñ turıdan – turı xucasına uzaçağına garantiä,- di Vasilenko.

Citäkçelär belderüençä, bügenge köndä xalıqnıñ 94%-ı fatir xaqın tärtiple tüläp bara häm bu san yaxşı kürsätkeç dip sanala Rusiä şartlarında.

Şamil Bahautdin, Samar.

XS
SM
MD
LG