Accessibility links

якшәмбе, 4 декабрь 2016, Казан вакыты 21:36

Törek jurnalistlarınıñ yazmaların Tatarstan döres tügel dip bara


Törkiäneñ Milliät gazetası şimbä könendä Tatarstan hawa alanında Törek wäkillärenä naçar mönäsäbät dip atalğan yazma bastırıp çığardı. Monnan tış, şuşı uq temağa, Törkiäneñ qayber başqa matbuğat çaraları da iğtibar itte, şulay uq yazmalar basılıp çıqtı.

Bu gäzitlärneñ internet säxifälärendä bäxäslär dä kitte. Tatarstan tügel, ä Rusiä şulay naçar mönäsäbät kürsätä digän fikerlär dä qalqıp çıqtı.

Eş närsädä soñ? Uzğan atnada, Qazannıñ Miraj dip atalğan kättä ber qunaqxanäsendä, Törek awiäşirkäteneñ Tatarstanda bülekçä açıp, anı täqdim itü çarası uzdı. Süz dä yuq, Törek şirkäteneñ Tatarstandağı hawa liniäläre bazarına kerüe zur waqiğa. Tik bu bazar, yäğni oçqıçlar tiräsendä ğawğa , köräş tınıç qına barmıy. Küplär mäsälän, Sibir kompaniäse belän, Tatarstan aviakompaniäseneñ Mäskäwgä oçqıçlar cibärüe tiräsendäge xällärne xäterlilärder. Şuşı bazarğa tağın Törkiä kilep quşıldı. Döres, Törkiä oçqıçlarında Qazanğa oçu xäzer berniçä distä dollarğa oçsızraq bul başladı. Läkin monısı ber xäl.

Näq menä, törek şirkäteneñ Qazanda bülekçä açıluına Törkiädän 70 läp qunaq kilgän ide. Alarnıñ küpçelege jurnalistlar, häm aralarında törkiä parlamentınıñ 20 läp deputatı da bar. Kilgändä, älbättä oçqıç belän, Qazan aeroportında bu qunaqlarnı bik äybät qarşı alğannar. Milliät gäzite yazuınça, korol’lär, patşalar kebek. Aeroportta, alar, ğadi xalıq yöri torğan yuldan tügel, ä VİP, däräcäle keşelär uza torğan zaldan uzğannar. Monda tantanalar da äybät bulğan, yäşäw dä, toru da. Anısına töreklär tel-teş tidermilär. Böten xikmät, kire Törkiägä oçqanda barlıqqa kilgän. Törkiädän kilgän qunaqlarnı Qazan aeroportında VİP zalğa kertep tormağannar, ä gäzit yazuına qarağanda, yök taşuçı yuldan samoletka uzdırğannar. Monnan tış, ul jurnalistlarnı, deputatlarnı çişenderep tentegännär, xätta ayaq kiemnärenä qädär saldırğannar. Törek deputatları, bu xälgä añlatma birüne sorasalar da, alarğa añlatma da birep tormağannar. Törek deputatları moña qarata protest beldergän.

Törkemdä bulğan Törkiäneñ Anawatan firqäse general' sekretare Möxärräm Doğan, Qazan aeroportında bezneñ kemnär bulğanıbıznı belä torıp şulay mısqıl ittelär dip belderde.

Doğan, Qazandağı bu xälne XAMAS wäkilläreneñ Törkiägä säfäre waqıtındağı kilep çıqqan mönäsäbät belän çağıştırdı. Törkiädä dä, XAMASlılarnı nıq tikşerü aşa, kargo, yäğni yök küçerü zalı aşa çığardılar dip añlattı.

Tağın ber törek deputatı Salix Gün, Bu eş, Tatarstan hawa yulları şirkäteneñ, Törek hawa yullarınıñ başlağan eşennän qänäğät bulmağanı öçen, yäğni konkurentlıkka şundıy mönäsäbät kürsätelde dip belderde.

Azatlıq radiosı, düşämbedä Qazan aeroportınan bu xälgä qarata añlatma ala almadaı. Hawa alanı citäkçeläre gel kiñäşmädä bulıp tordılar.

Anıñ qarawı, Tatarstannıñ Törkiädäge wäkillege keşeläre bu delegatsiä sostavında bulğan. Azatlıq radiosına, Tatarstannıñ Törkiädäge wäkile Radik Ğıymatdinov Tatarstannıñ säwdä häm tışqı iqtisadıy mönäsäbätlär ministrı bu xälgä qarata añlatma äzerli dip belderede. Ä wäzğıätne bolay buldı dip añlattı.

Älege säfärne Törek hawa yulları şirkäte oyıştırdı. Yäğni bu törek deputatlarınıñ säfäre räsmi töstä tügel ide. Häm şulay itep, aldan uq, kiräkle räsmi strukturalarğa, säfärne räsmi töstä oyıştırır öçen xäbär birelmägän ide. Şul isäptän VİP zal aşa ütär öçen dä. Häm iñ möhime, Törkiä gäzitläre yazğança, alarnı yök taşu terminalı aşa uzdıruları – döreslekkä turı kilmi. Alar oçqıçqa ğädäti zaldan, böten xalıq yöri torğan urınnan üttelär. Monnan tış, ul biznes terminal - xalıqara reyslar öçen eşlämi

Tatarstannıñ Törkiädäge wäkile Radik Ğıymatdinov buldı.

Monnan tış, wäkil, bu añlaşılmawçılıqnı, Tatarstan kiresençä uñay xäl itärgä tırıştı di. Barlıq mä’sälä, Törkiä hawa yulları şirkäteneñ häm Törkiäneñ Qazandağı konsullıgınıñ eşläp citkermäwe arqasında çıqtı dip belderde Azatlıqqa.

Räfis Cämdixan

XS
SM
MD
LG