Accessibility links

җомга, 9 декабрь 2016, Казан вакыты 08:51

Xatın-qızlar barın da buldıra


8ñçe mart yaqınlaşqan sayın, xatın-qız bäygeläre yışraq ütkärelä başladı. Alarda güzäl zatlar, iñ eşlekle, iñ töz atuçı, iñ yaxşı maşina yörtüçe, iñ yaxşı qotqaruçı, iñ yaxşı ana kebek isemnär öçen köräşte. Mart başında ğına, «Neçkäbil» bäygeseneñ final öleşe häm anda ciñüçelärne büläkläw çarası buldı. Belgänegezçä, bäygegä isem birgän, Abdulla Aliş äkiätendäge bal qortı Neçkäbil, eşlekle häm bala canlı bulğan. Älege bäygegä dä, närsägäder ireşkän, aktiv häm şul uq waqıtta ğailäle, balalı xatın-qızlar cälep itelgän. Böten respublikadan cıyılğan iñ aqıllı, iñ buldıqlı xatın-qızlar, final könne säxnädä tatarça da, urısça da çığış yasadı. Alay ğına da tügel, ul 21ber güzäl zat biznesların, ğailälären, sabıyların qaraw belän bergä atnalar buyı däwam itkän äzerlek künegülären dä uzarğa waqıt, köç taptı.«Neçkäbil» bäygesendä qatnaşuçılar, xatın-qızlar, hönärendä berençe bulırğa tırışıp, gailä qıymmätlären onıta bara digän fikerne kire qağarğa tırıştı. Ciñüçe bulıp, eşmäkär xanım İrina Klemenko tanıldı.

4nçe mart könne, «Yıl xatın-qızı» bäygeseneñ Qazan şähärendäge öleşe ütte, aña qädär başqa rayon, şähärlärendä dä iñ uñğannarnı büläkläw buldı. Anda mäsälän, 5 bala anası, balalar baqçası xezmätkäre dä maqtawlı büläk aldı. Eşmäkär xanımnar arasında, restorannar, kafelar açqan xatın-qız citäkçe İrkiä Töxvätullina ciñde.

6 mart könne, Yılnıñ iñ aqıllı, eşlekle xatın-qızları ataldı. Ütkän yal könendä, maşina yörtüçe xatın-qızlar arasında yarış ütkärelde. Anda qatnaşuçılar, xatın-qız yönläp maşina yörtä belmi, xaritadan yul taba almıy, digän fikerne kire qağarğa tırıştı. Qazanda ütkärelgän älege yarışta, televizordağı alıp baruçılar, şirkät citäkçeläre, yäş analar köç sınaştı. Ber xanım, xätta, berniçä aylıq balasın ätisenä tottırıp, üze kebek eşlekle xanımnar belän maşina yörtüçelär yarışına kitep bardı.

7 martqa, ğädättän tış xällär ministrlığı häm yanğın sünderü xezmäteneñ iñ çibär xatın-qızları arasında bäyge ütkärelde. Bu bäygedä ciñüçelär üz belgeçlege häm cır-biugä sälätlären kürsätergä tieş bula. «Eçke eşlär ministrlığı çibäre» bulırğa telägän tutaşlarğa da taläplär zur. Alar töz atarğa, köräşä alırğa, yögerü, sikerü kebek fizik yarışlarda köçlären kürsätergä tieş bula. Annan soñ ğına, cır,biyu, tämle aşlar äzerläw kebek ostalıqları sınala alarnıñ. «Eçke eşlär ministrlığı çibäre» iseme öçen 11 yäş tikşerüçe, yul xezmäte, matbuğat üzägendä eşläwçe tutaş köräşä. Mondıy yarışlardan, tatar xatın-qızları da çittä qalmıy. Qazan häm Çallıdağı şähär xatın-qızları ğına tügel, rayonnarda yäşäwçe tatar xanımnarı da üzläreneş sälätlären kürsätergä tırışa.

8nçe mart , xatın-qızlar xoquqları öçen köräş köne itep tanılsa da, Tatarstanda, bu bäyräm uñayınnan xatın-qızlarnıñ maturlığına, nazlı xatın, yağımlı analar bulularına dan cırlıylar.

Bikä Timerova

XS
SM
MD
LG