Accessibility links

дүшәмбе, 5 декабрь 2016, Казан вакыты 07:29

Äfğanstan prezidentınıñ Taliban citäkçese Paqstanda sıyına digän ğäyepläwlären Paqstan prezidentı kire qaqtı


Paqstan prezidentı Pärwäz Möşärräf Äfğanstan xökümäten Paqstanğa yala yağuda ğäyepläde. Yäkşämbe kiç CNN televideniesenä birgän äñgämäsendä ul, Äfğanstan prezidentı Xämit Qarzainıñ, Taliban citäkçese Möxämmät Ğömär mulla Paqstanda sıyına digän belderülären safsata dip atadı.

Yäkşämbe kiç CNN televideniesenä birgän äñgämäsendä Paqstan prezidentı Pärwäz Möşärräf Äfğanstan prezidentı Xämit Qarzaiğa kisken tänqit belän yabırıldı. Soñğı aylarda İslamabad belän Kabul arasında kierenkelek artu turında äytep, ul Qarzainı "üz ilendä närsä bulıp yatqanın abaylamawda" ğäyepläde. Möşärräfneñ iñ nıq açuın çığarğanı Associated Press agentlığı taratqan ber xäbär bulğan. Bu xäbärgä kürä, Qarzai, Talibannıñ ruxi citäkçese Ğömär mullanıñ könbatış Paqstanda qaçıp yatqan urını häm taliplar qullanğan telefon nomerları turında mäglümätlärne İslamabadqa tapşırğan bulğan.

"Alar bezgä isemlek birde, soñnan şunı mäglümät çaralarına citkergän, min moña şaq qattım. Alar şulay eşlägän ikän, min dä açıqtan-açıq äytäm. Bez isemlekne tikşerdek, ul telefon nomerlarınıñ 2/3se iskergän, üle sannar. Bu turıda CİA da belä. Omar mulla qaçıp yatqan urın digännäre dä – safsata. Anda ber kem dä yuq. Bez ul urında buldıq, anda berniçä ğailä yäşäp yata, Ğömär mullanıñ eze dä yuq", dide Paqstan prezidentı.

Şuşı çeterekle mäglümätlärneñ matbuğatqa ütüe öçen Möşärräf Äfğanstannıñ küzläw agentların ğäyepläde häm monı Paqstanğa maxsus räweştä yala yağu dip atadı.

Düşämbedä Äfğanstan xökümäte şuşı mäsälädä maxsus utırış ütkärde. Bu oçraşudan soñ, Äfğanstannıñ Tışqı eşlär ministrı Abdulla Abdulla, Kabul belän İslamabad arasında yaxşı mönäsäbätlär kirägenä basım yasadı, Qarzai belän Möşärräf arasındağı söyläşü neçkälekläreneñ matbuğatqä ütep kerüenä ükeneç belderde. "Äfğanstan belän Paqstan arasında aralar bozılu öçen nindider ber ayırım şähesne, törkemne, qäwemne ğäyepläw – döres tügel. Äfğanstannıñ saylanğan prezidentı, parlamentı bar. Alar bar Äfğan xalqına xezmät itä", dide ul.

Qayber küzätüçelär fikerençä, Möşärräfneñ bu yarsıp çığuınıñ säbäbe - çeterekle mäglümätlärneñ matbuğatqa ütüe genä tügel. Paqstannıñ Peşawar qalasındağı säyäsät belgeçe Afrasiab Xattaq monı Möşärräfneñ uzğan şimbä İslamabadta Amerikan prezidentı George Bush belän bulğan oçraşuı belän dä añlata. "Prezident Bush Aziä säfären başlap, başta Kabulda tuqtaldı. Anda ul, çik-ara mäsälälärne Paqstan prezidentı Pärwäz Möşärräf belän kütäräçägen äytte. Matbuğat oçraşuında telgä almasalar da, alar älbättä, bu turıda söyläşkän. Amerika yağınnan basım köçle, Möşärräfneñ xäle möşkel, şuşı açuın ul Äfğanstanğa çığara", di ul.

Afrasiab Xattaq süzlärençä, çınbarlıqta, İslamabad belän Kabul arasındağı mönäsäbätlär ul qädäre ük yaman tügel. Fäqät Möşärräf, Paqstan belän Äfğanstan çigen kontrolgä alırğa wäğdä itte, monı eşli almadı, xäzer Äfğanstan aña däğwa belderä, Möşärräfneñ şuña açuı kilä. Monnan tış Amerika belän Hindstan arasında xezmättäşlek artuı da anıñ eçen poşıra. Yuqqa ğına ul Qıtay belän partnerlıq turında söyli başlamadı, di belgeç.

İnde Taliban citäkçelärenä kilgändä, Xattaq süzlärençä, alar Paqstanda çınlap ta sıyına. İslamabad çınbarlıqqa turı kilmägän belderülär yasawın däwam itsä, aña kürşelärendä häm dönya cämäğätçelegendä ışanıç qazanu awır bulaçaq.

Ali Gilmi
XS
SM
MD
LG