Accessibility links

дүшәмбе, 5 декабрь 2016, Казан вакыты 19:50

Samaranıñ “Yaqtılıq” mäktäbe Sarıtawda ciñügä ireşte


Menä inde cidençe märtäbä Sarıtaw şähärendä mäktäp uquçıları arasında fänni konferensiä uzdırıldı. Bu cıyınğa İdel buyı şähärlärennän: Qazan, Balakovo, Pugaçev, Samara, Sarıtaw häm başqalardan distälägän uquçılar kilä. Samarnıñ “Yaqtılıq” mäktäbe balaları bu fänni bäygedä öçençe yıl qatnaşuları. Häm äytergä kiräk här yılnı yaqtılıqlar maqtawlı urınnarnı yaulıylar. Uquçılar üz töbäklärendäge ğöref- ğädätne öyränep, tarixi şäxeslärne barlap oluğ Watanğa mäxäbbät wä xörmät belän qararğa öyränälär. Şul konferensiädä qatnaşqan “Yaqtılıq” mäktäbe uqıtuçısı belän äñgämä totabız:

Bu fänni cıyın nindi bieklektä oyıştırılğan ide?

Fänni konferensiä Sarıtaw ölkäseneñ mäğärif ministrlığı, İdel buyı däwlät xezmäte akademiäse häm Sarıtawnıñ tatar gimnaziäse oyıştırğannar ide.

“Yaqtılıq” mäktäbe uquçılarınıñ uñışı nindiräk buldı, tağın kemnär çığış yasadı?

Konferensiä ike bülektän tordı. Berençesendä töp tema bulıp: “Rusiä xalıqlarınıñ berdämlege” tordı. Bu tema buyınça töp dokladnı däwlät xezmäte akademiäse citäkçese yasadı. Şulay uq tatar milli xäräkäte citäkçese Zöfär Xäkimov häm Mokatdäs xäzrät Bibarsov çığış yasadılar. Mäğärif ministrlığınıñ baş belgeçe Nina Graçeva istälekle notıq tottı. Çeçen milli xäräkäte yulbaşçısı Räis Dakaev süzläre dä tä'sirle buldı.

Plenar utırışta konferensiädäge iñ yaxşı xezmätlär tıñlandı. İñ yaxşılar isemlegenä bezneñ mäktäpneñ uquçısı Yuliä Safina da kerde. Anıñ: “Qol Şärif- aqın, şağir, mäğrifätçe” isemle xezmäte yuğarı bäyälände. Yuliä Safinanıñ fänni xezmät citäkçese Fäniä Ğilacewa uquçısın bik yaxşı äzerlägän ide.

Konferensiäneñ ikençe bülege Sarıtaw şähäreneñ tatar gimnaziäse binasında uzdı. Gimnaziä direktorı Zäkiä xanım Salaskina fänni forum uñışlı ütsen öçen zur köç quyğan hönärmänd. Monda uquçılar tuğız seksiägä bülenep eşlädelär. Tuğız yünäleştäge fänni tikşerenülärne törle- törle illyustratsiälär, muzıka aşa, milli kiemnär aşa yöräkkä ütkärerlek itep kürsätä beldelär.

Samarnıñ “Yaqtılıq” uquçıları öç seksiädä üzläreneñ zihenleklären kürsättelär. “Watan tarixı” bülegendä Aysılu Kıyämova “İdel buyı bolğarlarınıñ tarixına” tuqtaldı.

Fol'klor häm etnografiä seksiäsendä “Yaqtılıq”tan ike uquçı qatnaştı.

“Samar töbägendä tuquçılıq” isemle xezmätne Fänis Alyuşev yaqladı, ä borınğı bolğarlarnıñ cirläw yolaları turında Güzäl Xösnetdinova söyläde.

Kıyämova Aysılu, Alyuşev Fänis üz seksiälärendä ikençe urınnı aldılar. Güzäl Xösnetdinova da qızıqsındıru prizına layıq buldı. Bezneñ balalarnıñ fänni xezmätläre konferensiäneñ cıyentıqlarında basılıp kilä.

Min şunı äytäsem kilä. “Yaqtılıq” mäktäbeneñ uquçıları eşli dä belälär, eşlärgä teläkläre dä bar.

Fol'klor häm etnografiä seksiäsendä berençe urınnı Sarıtaw şähäreneñ tatar gimnaziäse aldı. Alar kürsätkän “Tatar tuyı” soqlanırlıq ide.

Şamil Bahautdin, Samar.

XS
SM
MD
LG