Accessibility links

пәнҗешәмбе, 8 декабрь 2016, Казан вакыты 15:03

Yewropa Berlege Rusiä belän yağulıq xezmättäşlegen arttırırğa teli, ämma berdäm eş itüne xup kürä


Tabiği baylıqları bik bulmağan Yewropağa çittän yağulıq alu turındağı bäxäslärgä Yewropa komissiäse dä üz öleşen kertergä buldı. Rusiä belän Ukraina arasında çıqqan gaz suğışınıñ tä''siren sizgännän soñ ul xäzer Mäskäw belän yaña energetik berektäşlek qoruğa öndi, ämma bu mäs''älädä Yewropa Berlege illäre Rusiä belän ayırım-ayırım tügel, ä ber qaraşta torıp söyläşergä tieş dip belderä.

Yağulıq ölkäsendä Yewropanıñ şaqtıy zäğif xäldä buluı ser tügel, häm Yewrokomissiä monı tanıy ğına. Mäskäw belän Kiev arasında çıqqan gaz suğışı Yewropanıñ bu mäs''älädä başqa tarafqa bäyle buluın tağın ber märtäbä häm bik yaxşı kürsätte - "Gazprom"nıñ Ukrainağa gaz birüen kimetüe şunda uq Yewropa illärendä dä sizelde. Läkin Yewropa Komissiäse açıqtan-açıq nindi dä bulsa yaqnı, bu oçraqta Rusiäne tänqitläwdän totılıp tordı. Çärşämbedä iğlan itelgän belderü monıñ säbäben añlata kebek - üzeneñ Rusiägä bäylelegen sizsä dä, ixtiacı artuı sürätendä Yewropa anı kiläçäktä dä töp partnerlarınıñ berse itep küräçägen äytä. Yewrokomissiä räise Jose Manuel Barosso:

"Bez Rusiä belän uñay mäğnädä bäyläneşergä telibez. Minemçä, bez şaqtıy bäysez. Ägär dä bez Rusiädän yağulıq çimalınıñ kilüen telibez ikän, Yewropa kebek totrıqlı ber bazar belän eş itü Rusiäneñ üzenä dä faydağa ğına bulaçaq", dip añlata bu xezmättäşlekneñ ike yaq öçen dä faydalı buluın Barosso.

Yewropa komissiäse räise şuşı mäs''älälärne tikşerü öçen üzeneñ mart azaqlarına taba Mäskäwgä baraçağın iğlan itte, anı prezident Putin çaqırğan. Yewropa Berlege mäğlümatına qarağanda, ul üzeneñ neft ixtiacın Rusiädän 22 protsentqa, ä gaznıqın 32 protsentqa qaplap bara. Bügenge täräqqiat kiläçäktä dä şulay däwam itsä, Yewropa Berlege qullanaçaq yağulıqnıñ 70 protsentın çittän alırğa mäcbür bulaçaq.

Martnıñ 23-24-endä Brüsseldä Yewropa Berlege illäre citäkçeläreneñ oçraşuı uza, Barosso Mäskäwgä aña qädär barıp, şul cıyılışta inde säfäre xaqında xisap totarğa cıyına. Brüssel oçraşuında qaralaçaq töp mäs''älälärneñ berse bulıp Berlekneñ energiä ölkäsendäge maxsus dokumentın qaraw da tora.

Berük waqıtta Jose Manule Barosso, Rusiä-Yewropa yağulıq xezmättäşlegen kiñäytüne alğa sörü belän bergä, Yewropa Berlege bu eşne berdäm alıp barırğa tieş, şul oçraqta ğına yuğarı näticälärgä ireşep bula, dip tä isäpli:

"Bu eştä bezgä säyäsi ixtiar köçe kiräk häm bez monı Yewropa Berlege summitında kütärergä cıyınabız da. Bezneñ energiä ölkäsendä urtaq Yewropa strategiäse buldıru teläge barmı, yuqmı - soraw şundıy", di Barosso.

Älegä Yewropa Berlegeneñ bu ölkädä urtaq säyäsäte yuq, Barosso süzlärenä qarağanda, 25 il kergän berlek eçendä bügengä qädär 25 ayırım bazar ğına yäşäp kilä. Urtaq säyäsät buldıru ixtiacı eçke wäzğiatkä dä qarıy - soñğı aylarda Fransiä, İspaniä, İtaliä kebek äğza illär üzlärendäge energiä şirkätläreneñ başqa däwlätlär qulına eläkmäwe öçen kirtälär qora başladı. Yewropa Komissiäse monı kisken tänqitläp çıqtı, ul andıy çaralarğa yul quymaw mömkinleklären ezli.

Kärim Kamal
XS
SM
MD
LG