Ufada yäşäwçe dön''yaküläm tanılğan tatar ğalime, Rusiä Fännär akademiäseneñ Ütä sığılmalı metallar problemaları institutınıñ elekke direktorı, akademik Oskar Kaybıyşev östennän başlanğan mäxkämä eşe däwam itä. Atnakiç könne Başqortstan Yuğarı mäxkämäsendä şuşı eş buyınça mäxkämä utırışları ozaq qına tänäfestän soñ yañadan başlanıp kitte. Xäzer bu utırışlarda şahitlarnıñ çığışları tıñlanaçağı mäğlüm. Alar siksängä yaqın keşe dip xäbär itte Yuğarı mäxkämä matbuğat üzäge wäkilläre.
Elegräk tä xäbär itelüençä, Oskar Qaybışewnı çit illärgä Rusiäneñ ike täğäyenläneştäge sänäğät texnologiälären satuda häm finans mutlıqlarda ğäyeplilär. Ä tanılğan akademik üzenä tağılğan ğäyepläwlärne kire qağa häm “bu bezneñ konkurent firmanıñ häm anıñ mänfägat''lären yaqlawçı iminlek orğannarınıñ berlektäge xösetlege, zakaz buyınça baruçı qoyı qazuı”, – dip belderä. Ägär Oskar Qaybışewnıñ ğayıbe Yuğarı mäxkämädä raslansa, aña 10 yıllıq törmä cäzası yanıy.
Atnakiç könne irtänge säğätlärdä ük başlanğan mäxkämä utırışları kiçke säğätlärgä dä tämamlanmağan ide äle. Şuña da Yuğarı mäxkämä wäkilläre dä “Azatlıq” xäbärçesenä añlatma birüdän tıyılıp qaldı. Akademik Qaybışewnıñ üze belän dä elemtägä kerü mömkin bulmadı. Fatirlarına şaltıratqaç, anıñ tormış iptäşe bügen çınlap ta mäxkämä utırışları başlanğanlığın ğına xäbär itä aldı.
