Accessibility links

пәнҗешәмбе, 8 декабрь 2016, Казан вакыты 07:02

Omski möxtäriäte binasız qala


Küptän tügel Omskinıñ şähär xakimiätendä “İke vlast' söyläşüe” digän isem astında mer qarşındağı kollegiäneñ çirattağı utırışı bulıp uzdı. Anda yäş buınnı tärbiäläwdä şähär xakimiäteneñ häm ictimaği oyışmalarnıñ role digän soraw kön qadağında buldı, dini häm milli-mädäni oyışmalarnıñ köçläre dä berläşterelep şul yünäleştä alıp barılırğa tieş digän fiker belderelde, tatarlar öçen çeterekle soraw - ölkä tatar milli-mädäni möxtäriäte urnaşqan binanı arendalau mäs’äläse dä quzğatıldı.

Şähärneñ küçemsez milek departamentı direktorı Yuri Gamburg, tatar möxtäriäteneñ arenda häm kommunal'-toraq xezmäte bäyälären waqıtında tülämäwe turında bäyän itte. Arendağa alğannan birle möxtäriät binanı tözekläşländerü östendä eşlämäde, şul säbäple bina tawşalğan xälgä kilde dip tä östäde. Näticädä, kollegiä utırışında 2006-nçı yılğa arenda kileşüen tözemäskä digän qarar qabul itelde. İrtägesen älege qarar yazma räweştä tatar möxtäriätenä citkerelde. Mondıy qatğıy färmannı qulına alğannan soñ, möxtäriät citäkçese Xäkim Sadıykov aşığıç räweştä idärä äğzaların häm tatar xäräkäte aktivistların çirattan tış utırışqa cıydı häm möxtäriätneñ binadan quılıp çığarılu aldında toruı turında belderde. Tatar oyışmaları aktivistları törle fikerlär belderep, qızu söyläşü alıp barsalar da, problemanı xäl itärlek yul taba almadılar.

Çarasızlıqtan aptırağan Xäkim Sadıykov, binanı yuğaltqan oçraqta, milli eştän kitäçäge häm üzeneñ hönäri eşläre belän genä şöğellänäçäge turında belderde.

Aktivistlar, binanıñ bulu-bulmawına qaramastan, tatar xalqı öçen eşlärebezne däwam itäçäkbez, didelär, häm tağı ber märtäbä xat belän gubernatorğa möräcäğät itep qararğa digän fikergä kildelär.

Dörestän dä, Omskinıñ tatar oyışmalarınıñ eşçänlege tuqtalıp tormıy. Bu könnärdä xatın-qızlar bäyräme uñayınnan küptörle çaralar bulıp uzdı. “Umırzaya” ansambleneñ konsert-kiçäse, “Fäniä” yäşlär studiäseneñ, “Tanışu” klubınıñ yal kiçäläre xatın-qızlar könenä bağışlap ütkärelde. Östäp şunı da äytergä kiräk, “Umırzaya” ansamble konsertı barışında, kollektivta 17 yıl buyınça armıy-talmıy eşläp kilüçe bayançı Näğim Möxamadullinğa Bötendönya tatar kongressı başqarma komitetınıñ räxmät xatı tapşırıldı. Şundıy uq räxmät xatlarınıñ Omskinıñ 1-nçe pedagogiä kölläteneñ tatar tele uqıtuçısı Gölsinä Axmerovağa häm Ülänkül awılı “Naza” ansamble bayançısı Ämir Säfarmetovqa buluı turında belderelde.

Rozaliä Sayganova, Omski

XS
SM
MD
LG