Accessibility links

Кайнар хәбәр

Balkan suğışları artında torğan häm monıñ öçen cawapqa tartılğan Miloşeviç wafat


Haagtağı Xalıqara Mäxkämä şimbä köndez, inde menä bişençe yıl xökem qararın kötep yatqan elekke yugoslav prezidentı Slobodan Miloşeviçneñ wafat buluın iğlan itte. 64 yäşen tutırğan häm soñğı aralarda yöräk wä qan basımı problemalarınnan intekkän Miloşeviç üle kileş üzeneñ zindanında tabılğan.

Ğinwar ayında ul däwalanu öçen Mäskäwgä baru telägen beldergän ide, ämma tribunal anıñ kire Haagqa qaytuı soraw astında qalaçaq dip, anıñ bu ğözeren kire qaqtı. Ul çaqta Rusiä bar kiräk garantiälärne dä biräçägen wäğdä itte, Mäskäwdäge tışqı eşlär ministrlığı wäkile Mixail Kamınin bolay digän ide:

"Mäskäw däwalanu öçen Miloşeviçne Rusiägä kiterügä kiräkle bar dokumentlarnı da Xalıqara mäxkämägä birde, moñardan tış Miloşeviç üze dä däwalanğannan soñ kire Haagqa qaytaçağın wäğdä itä", dip beldergän ide Rusiä tışqı eşlär ministrlığı wäkile.

Ämma monıñ öçen awır cinayätlärdä ğäyeplängän Slobodan Miloşeviçne waqıtlıça azat itü kiräk ide, citmäsä ul üzen elek tä yaqlap kilgän Rusiägä barırğa teläde, şuña kürä mäxkämä monı kire qaqtı. Andağı prokuror Carla del Ponde ğinwar ayında Miloşeviçneñ Haagta da doktorları yaxşı, dip belderde:

"Üz sälämätlegen saqlaw öçen Miloşeviçneñ Haagta da bar mömkinlekläre häm doktorları bar", digän ide prokuror Carla del Ponte.

Miloşeviçneñ Mäskäwdä enese yäşi, anıñ xatını häm ulı da Rusiädä digän xäbärlär bar. Tribunalda, Rusiägä kitkännän soñ elekke yugoslav prezidentı sälämätlegenä sıltanıp mäxkämä utırışına qaytuın kiçekterä ala, dip şikländelär. Moña qädär Miloşeviç şaqtıy uñışlı ğına üz eşen qarawnı törleçä kiçekterü yulların qullanıp kilgän ide. Şuña kürä dä ul bügengä qädär qılğan cinayätläre öçen bernindi dä cäzağa xökem itelmäde.

Anıñ mäxkämäse Haagta äle 2002-nçe yılnıñ 12-nçe fivralendä başlandı, elekke prezident 90-nçı yıllarda yugoslav cirlärendä barğan suğışlarda genotsid, keşeçelekkä qarşı cinayätlär, başqa suğış yawızlıqları qıluda ğäyeplände. Mäxkämädä Miloşeviç üzenä täqdim itelgän advokatlardan baş tarttı häm üzen yaqlaw eşen üze alıp bardı. Mäxkämäne ul baştan uq yalğan dip atadı häm bar ğäyepläwlärne kire qaqtı.

"Min bu tribunalnı häm anıñ ğäyepläwlären yalğan dip isäplim, Berläşkän Millätlärneñ Ğomumi Mäclese tarafınnan raslanmağan ikän, bu qanuni tügel", dip beldergän ide Slobodan Miloşeviç.

Şuña da qaramastan ul Balkan suğışları, alarda distälärçä meñ keşene yuq itü, yäşägän urınnarınnan quu artında toruçı töp keşe bularaq sanala. Miloşeviçneñ üleme raslanğannan soñ Fransiä tışqı eşlär ministrı, misal öçen, "20-nçe ğasır azağınıñ Balkan suğışlarındağı töp uyınçılarnıñ berse, bälkem dä, töp uyınçısıdır da, wafat buldı", dip belderde.

Kärim Kamal
XS
SM
MD
LG