Accessibility links

җомга, 9 декабрь 2016, Казан вакыты 14:44

Samarda tatar mäktäbe ikelätä zurraq bulaçaq


Samar şähärendä 220 bala uquçı “Yaqtılıq” mäktäbe uñışlı ğına eşläp kilä. Un yıl elek balalar baqçası binasında başlanğan mäktäp kön taläplärenä cawap birmi başladı. Uzğan yılnı “Tuğan tel” isemle Samara ölkä tatar cämğiäte häm Samar şähär tatar milli- mädäni möxtäriäte aktivistları gubernator Konstantin Titov belän oçraşıp, tatar balalarınnan tuplanğan mäktäpne zuraytu turında süz alıp bardılar. Gubernator Titov bernindi qarşılıqsız üzeneñ rizalığın belderde häm finanslawğa yärdäm itäçägen dä äytte.

Uzğan yılnıñ avgustınnan başlap “Yaqtılıq”qa töp binadan zurraq yanqorma tözü başlanıp kitte. Äle şul yanqorma urınına quyılğan distälägän timer garajlarnı alu ğına da tulı ber mäşäqätkä äylände häm bu töyerne çişärgä rayon, şähär citäkçeläre bik küp köç quydılar. Tözeleş öç ay bardı, berençe, ikençe qatlar kütärelde. Näq menä şul waqıtta tatar cämğiäte äydämannarı başına tağın ber fiker kilde- tözegän, tözegän, nigä äle binanı öç qatlı imäskä. Aktlar zalı bulmağan mäktäp nindi mäktäp inde ul? Belgeçlär binanıñ nigezlären tikşerdelär. Fundament öçençe qatnı kütäräçäk digän näticä yasaldı.

Tözeleş buyınça ciñ sızğanıp yörüçe Wazıx Möxämmätşin, Azat Nadirov, Änwär Bul'xin öçençe qat tözü buyınça dokumentatsiä buldıru östendä eşli başladılar. “Tärräqiät» isemle tözeleş- remont firmasınıñ general' direktorı Wazıx Möxämmätşin:

“ Alğa yaña qarar häm tağın da zurraq mäşäqätlär kilep bastı. Texnik dokumentatsiägä tözätmälär kertergä kiräk bulıp çıqtı. Bu yünäleştä zur köç quyuçılar- tözüçe- incener Niqolay Fedorov, Azat Nadirov häm Xaridä Daşkina. Annan soñ här dokumentta här eşneñ srogı kürsätelergä tieş.

Maqsat ber- öç smena eşläsäk eşlärbez, ä yaña mäktäpne sentäberneñ berenä tapşırırğa tieşbez. Östämä öçençe qat östälgäç, proyekt tulısınça üzgärtelä. Şuña da yaña proyekt ekspertiza uzarğa tieş. Bu eş belän Seleznev äfände şöğellänä. Tözeleş tiz barsın öçen bezgä aradaş oyışmalar kiräk tügel. Proyektçılar här planerkağa çaqırılırğa tieşlär. Alar turıdan- turı bezneñ belän eşlärgä tieşlär. Yaña texnik zadanie nigezendä proyektçılar üzlärenä üzgäreş kertsennär, bu eş tözeleşne tuqtatmıy torıp alıp barılırğa tieş. Tözüçelär tänäfessez öç smena eşläyäçäk . Kiräk bulsa tözeleşkä östämä köçlär ırğıtaçaqmın, tönlä projektorlar astında eşlärlär. Bu bezneñ öçen tabiği xäl, läkin dä yaña uqu yılı öç qatlı yaña mäktäptä başlanaçaq.

Şunı da istä totarğa kiräk. Kiräk cirdä parket idännär bulsın, zatlı işeklär, yaqtırtqıçlar. “Yaqtılıq” mäktäbe iñ yaxşı mäktäp bulsın. Zur borçılularğa urın yuq. Ölkä häm şähär administratsiäläre aqçanı waqıtında birep baralar. Räxmät alarğa.

Tözüçelär üz eşlären başqarıp çığaçaqlar, parallel' balalar cıyunı däwam itegez, iñ yaxşı uqıtuçılarnı eşkä çaqırığız”,- di “Yaqtılıq” mäktäbeneñ yaña binasın tözüne kontrol'dä totuçı “Tuğan tel” citäkçeläreneñ berse, “Tärräqıät” isemle tözeleş- remont firmasınıñ general' direktorı Wazıx Möxämmätşin.

Wazıx Möxämmätşin bina da tözi, balalarnıñ ğına tügel, alarnıñ ata- analarnıñ da ruxi ofığın kiñäytüdä eş alıp bara. Wazıx Möxämmätşin “Yaqtılıq” mäktäbeneñ 220 uquçısına üz aqçasına “Azan” gäciten yazdırıp birde.

Şamil Bahautdin, Samar

XS
SM
MD
LG