Accessibility links

шимбә, 3 декабрь 2016, Казан вакыты 07:43

Qazan säxnälärendä tatar studentları tamaşa qıla


Bu aralarda Qazanda studentlarnıñ mädäni tormışı bik aktiv bara. Spektakl’lär, konsertlar, törle kiçälärdän tış, alarnıñ üzläre oyıştırğan çaralar da bu atnada az tügel. 13 marttan Qazanda Yäşlär säxnäse bäygese açıldı. Sişämbedän isä Qazan däwlät universitetında Studentlar yazı-2006 festivale başlanıp kitte. Bıyılğı Studentlar yazı festivale 30 martqa qädär däwam itäçäk. Anda ğädättägeçä Qazan däwlät universitetınıñ törle fakul’tet studentları cırda, biüdä, başqa sänğät törlärendä köç sınaşaçaq. 14 martta başlanğan bäygene universitetnıñ tatar filologiäse häm tarixı fakul’tetı başlap cibäräçäk. 8 tamaşa ütkännän soñ, andağı iñ qızıqlı, iñ äybät çığışlar gala-konsertqa saylanıp alınaçaq. Ul 25 aprel’dä ütär dip kötelä.

13 martta Qazanda yäşlärneñ tağın ber bäygese başlanıp kitte. Monısı – Yäşlär säxnäse dip isemlängän studentlar häm yäşlärneñ teatr studiäläre festivale. 20 martqa qädär Qazan, Çallı, Mäskäw studentları üzläreneñ ostalığın kürsätäçäk. Alarnıñ tamaşaların şähärneñ Ğäliäskär Kamal, Kärim Tinçurin isemendäge teatrlarında, Akterlar yortında, tatar filarmoniäseneñ konsertlar zalında qararğa mömkin.

Yäşlär säxnäse bäygese turında tulıraq mäğlümät alu niäte belän bez älege çaranı oyıştıruçılarğa möräcäğät ittek. Bötendönya tatar kongressı Başqarma komitetınıñ baş referentı İldar Mingäräev Azatlıq radiosı tıñlawçılarına menä närsälär söyläde.

Älege bäyge bıyıl inde ikençe märtäbä ütkärelä. Uzğan festival’dän anıñ ayırması – qatnaşuçılarnıñ geografiäse kiñräk. Bıyıl Qazannan ğına tügel, Çallı, Mäskäwdän dä qatnaşuçılar bulaçaq. Bäygeneñ maqsatı isä ana telebezne saqlap qalu, yäşlärdä, törle uqu yortlarında belem aluçı studentlarda telebezgä qarata mäxäbbät, ixtiram uyatu. Yäş artistlarnıñ çığışların märtäbäle jyuri bäyäläyäçäk

13 martta Qazanda başlanğan Yäşlär säxnäse dip isemlängän studentlar teatr-studiälärene bäygesendä qatnaşuçılarnıñ çığışların 19 martqa qädär Qazan säxnälärendä qararğa mömkin. Festival’ne yomğaqlaw kiçäse Kärim Tinçurin isemendäge teatr binasında 20 martta uzaçaq.

Gölnaz İlgizär

XS
SM
MD
LG